Senat saýsaq izin mindetti tapsyrý týraly zań jobasyn qabyldady

Búgin Parlament Senatynyń jalpy otyrysynda joǵarǵy palata depýtattary «Daktıloskopııalyq jáne genomdyq tirkeý týraly» zań jobasyn qabyldady, dep habarlaıdy QazAqparat. «Zań jobasy daktıloskopııalyq jáne genomdyq tirkeý júrgizýge jáne sol aqparatty adamnyń jeke tulǵasyn anyqtaý men rastaý maqsatynda qoldanýǵa quqyqtyq negiz beredi»,-dep habarlady QR Ishki ister mınıstri Qalmuhanbet Qasymov zań jobasyn tanystyra otyryp. Mınıstrdiń aıtýynsha, saýsaq izin alý halyqaralyq deńgeıde keńinen qoldanylatyn tájirıbe jáne adamnyń jeke tulǵasyn anyqtaıtyn ulttyq qujattarda qoldanylyp júrgen halyqaralyq standartqa aınalǵan. 2009 jyldan beri  qazaqstandyqtar jeke tólqujat pen jeke basyn kýálandyratyn qujatqa sýretin, ózi týraly aqparatty, qolyn elektrondy chıp arqyly ornatyp júr  Al, saýsaq izin tirkeý týraly zań jobasynda daktıloskopııalyq jáne genomdyq tirkeýge jatatyn tulǵalardyń toby, sondaı-aq ony jınaıtyn jáne saqtaýǵa jaýapty memlekettik organdardyń tolyq tizbesi anyqtalady. 1992 jyly Qazaqstan qujattardyń bıometrıkalyq parametrleri týraly halyqaralyq kelisimdi ratıfıkasııalady. Qazirgi kezde tulǵany kýálandyratyn 11 qujattyń jeteýinde bıometrıkalyq kórsetkishterdi engizý qarastyrylady. Bizdiń tólqujattar men jeke kýálikterde elektrondy chıpter bekitilgen, bular arqyly bıometrıkalyq málimetterdi engizýge bolady. Daktıloskopıkalyq tirkeý tólqujat pen jeke kýálikti nemese teńizshiniń jeke kýáligin rásimdeý kezinde iske asyrylady. Balalar 12-den 16 jasqa deıin tólqujat alǵan kezde olar óz erkimen nemese ata-anasynyń kelisimimen daktıloskopıkalyq tirkeýge alynady. 12 jastan kishi balalar bundaı tirkeýmen qamtylmaıdy. Sonymen qatar sheteldikter vıza alǵan kezde saýsaq izderin tapsyratyn bolady. Budan bólek, daktıloskopıkalyq tirkeý bosqyndarǵa, eńbek mıgranttaryna, Qazaqstanda turatyn sheteldikterge qatysty eskerilip otyr.