Astanada 17 shaǵyn emhana ashylady

Elordalyq medısınanyń aldynda týyndap otyrǵan basty másele halyq sanynyń turaqty negizde orta eseppen 40 myń adamǵa ósýi. Bul týraly Astana qalasy qoǵamdyq keńesiniń otyrysynda qalalyq densaýlyq saqtaý basqarmasynyń basshysy Erik Baıjúnisov málim etti. Onyń aıtýynsha, búgingi kúni Astanada bir mıllıon halyq turady, al qalalyq emhanalar 500-600 myń adamǵa eseptelgen, sol sebepti bir jarym ese júktemeni kóterýge májbúr, dep habarlady elorda ákimdiginiń baspasóz qyzmeti. «Biz birinshi sanıtarlyq medısınalyq kómek kórsetý ortalyǵynyń (BSMK) ekeýin emhana etip qaıta qurdyq, bul «Shapaǵat» otbasylyq densaýlyq ortalyǵy jáne Ilınka aýylyndaǵy ortalyq. Qazir olardy qajet qural-jabdyqtarmen jabdyqtap, kadrlarmen qamtamasyz etý jumystary júrgizilýde, nátıjesinde ortalyq emhanalarǵa júkteme azaıatyn bolady», – dedi E. Baıjúnisov. Sondaı-aq, ol Astanada memlekettik jeke menshik áriptestik tetigi boıynsha 8 emhana salynyp, hospıs ashylatynyn, qala boıynsha 17 shaǵyn emhanany iske qosý josparlanyp otyrǵanyn jetkizdi. Jańashyldyqtardyń taǵy biri biryńǵaı medısınalyq kartaǵa, odan keıin genomdyq medısınaǵa kóshý. «Genomdyq medısına – bala týǵan kezde onyń qandaı aýrýlarǵa beıim ekenin anyqtaýǵa kómektesedi», – dedi ol. Medısına salasyndaǵy barlyq jańashyldyqtar Astana qalasynyń ákimi Áset Isekeshevtiń tapsyrmasymen ázirlengen «Astana – densaýlyq qalasy» baǵdarlamasy sheńberinde engizilýde. Joba aýrýlardyń aldyn alýdy qarastyrady, sondaı-aq onda halyqty salaýatty ómir saltyna baýlýǵa erekshe nazar aýdarylǵan. Erik Baıjúnisovtyń aıtýynsha, salaýatty ómir saltyn ustaný onkologııalyq jáne basqa da aýrýlarǵa shaldyǵý qaýpin 20%-ǵa tómendetedi.