Erekshe muqtajdyqtary bar múmkindigi shekteýli balalarǵa arnalǵan psıhologııalyq-pedagogıkalyq túzeý kabıneti «Dara» qorynyń «Ártúrli jáne teń: Biz ınklıýzıvti bilimdi jaqtaımyz» jobasy aıasynda Qostanaı oblystyq ákimdiginiń qoldaýymen ashyldy.
Qostanaı oblysynda erekshe muqtajdyqqa ıe on myńnan astam bala turady. Damýynda ózgeris, ereksheligi bar balanyń ata-anasy ony ári qaraı ósirýde, oqytyp, damytýda óz problemasymen ózi betbe bet ońasha qalady. Osyǵan oraı, Qostanaı qalasynda múgedek balalar men olardyń otbasyna tıimdi kómek kórsetetin ortalyq birinshi ret ashyldy. Onda erekshe muqtajdyǵy bar múgedek balalarǵa kómek beretin defektolog, psıholog, tıflopedagog, logoped, sýrdopedagog, massaj jasaýshy mamandar bar. Ortalyqta balalardyń alańsyz oınaýyna, júrip-turýyna kedergisiz ári jabdyqtyń barlyǵy arnaıy ádisteme boıynsha jasalǵan.
«Kez kelgen bala ózgelermen teń bilim alýǵa quqyly. Balalardyń boıyndaǵy erekshe qabiletterin damytyp, olardyń ómirden laıyqty ornyn tabýyna múmkindik jasaıtyn kabınetti ashýǵa úlesin qosqan azamattarǵa alǵysym sheksiz», – dedi oblys ákimi Arhımed Begejanuly.
Ortalyqqa 7 jasqa deıingi 125 bala tirkelgen. Olar mamandardan kereginshe kómek ala alady. «Dara» qaıyrymdylyq qorynyń jobalar basshysy Maral Sheshembekova múgedek balany damytý úshin ortalyqtyń mańyzy zor ekendigin aıtty.
Kabınetterdi aralap kórgen oblys ákimi Arhımed Muhambetov sýrdokabınetke qajetti jabdyqtar jáne kompıýterlik tehnıka alý úshin qarjylaı kómek sertıfıkatyn tapsyrdy.
Názıra Járimbetova,
«Egemen Qazaqstan»
