Baıqaýdyń úzdik jumystary tańdaldy

Keshe Premer-Mınıstrdiń orynbasary Imanǵalı Tasmaǵambetovtiń tóraǵalyǵymen Qazaqstan Respýblıkasynyń Ulttyq brendin anyqtaý boıynsha baıqaýdyń sarapshylyq keńesiniń otyrysy ótti, dep habarlaıdy Premer-Mınıstrdiń resmı saıty. Qazirgi ýaqytta óńirlik brendıng kóp jaǵdaıda mem­lekettiń týrıstik jáne ınvestısııalyq tartymdy­lyǵy­­nyń deńgeıin anyqtaıdy, olardyń ónimderiniń tanymal­dyǵyn arttyryp, halyqaralyq arenadaǵy bedeline jáne ǵalamdyq eńbek bólinisindegi ornyna yqpal etedi. «Sońǵy jyldary álemde vızýaldy grafıka keńinen qoldanylýda. Adamnyń 80 paıyzy aqparatty kórý arqyly alady. Kásibı marketologtar burynnan beri óz jumystaryn osy qaǵıdanyń negizinde júrgizip keledi. Sondyqtan, búgingi tańda málimetti tez uǵyný úshin ınfografıka, foto-beıne materıaldarǵa basymdyq berilýi kezdeısoq emes», dep atap ótti otyrys barysynda vıse-premer Imanǵalı Tasmaǵambetov. Eske sala keteıik, Qazaqstannyń halyqaralyq arenadaǵy oń kelbetin qalyptastyrý jáne tanymaldyǵyn arttyrý, qazaqstandyq erekshe týrıstik oryndardy aqparattyq qoldaý, sheteldik ınvestısııa tartý maqsatynda uıymdastyrylǵan Qazaqstan Respýblıkasynyń Ulttyq brendin anyqtaý jónindegi respýblıkalyq baıqaý 31 tamyzda bastaldy. Baıqaýǵa qatysýshylardan Qazaqstannyń álemdik keńistikte tanymaldyǵyn arttyrýda qoldanylatyn logotıp nemese emblema jobasyn jáne oǵan uran sózdi qosa usyný talap etildi. Uıymdastyrý komıtetine azamattardan barlyǵy 1000-nan asa joba kelip tústi. Qazirgi ýaqytta baı­qaý­dyń I kezeńi – ınternet qoldanýshylarynyń daýys berýi aıaqtaldy. Onyń aıasynda qazaqstandyqtar óz­derine unaǵan jobaǵa daýys berdi. Ekinshi kezeń – ınternet daýys berý nátıjesinde iriktelgen úzdik jobalar Sarapshylyq keńeste tanystyryldy. Atap aıtqanda, Sarapshylyq keńestiń qaraýyna daýys berý nátıjesinde eń kóp daýys jınaǵan 40 jumys usynyldy. Sarapshylar bulardyń ishinen úzdik 10 jobany tańdap alady. Baıqaý erejesine sáıkes Qazaqstan Respýblıkasynyń Ulttyq brendi – resmı logotıpi men urany qalyń kópshilikke tanystyrylady. Sarapshylyq keńes quramyna tanymal saıasat jáne qoǵam qaıratkerleri, memlekettik organdar ókilderi, mádenıet pen óner qaıratkerleri kiredi. Sarapshylyq keńestiń sheshimimen kelesi otyrys týra bir aıdan keıin ótkiziledi, onda usynylǵan fınal­dyq jobalar qaralady.