Qazınvestbank barlyq operasııalardy toqtatty

Qazaqstannyń kommersııalyq Qazınvestbanki  dúısenbige deıin banktik operasııalardyń barlyq túrin toqtatyp qoıdy, dep habarlady abctv.kz portaly banktiń koll-ortalyǵyna silteme jasap. «Tehnıkalyq irkilis týyndady, soǵan baılanysty dúısenbige deıin operasııanyń barlyq túri toqtatyldy.  Qazir eshbir operasııa jumys istemeı tur.  Qandaı da bir málimet bere almaımyz, resmı málimdeme dúısenbi kúni jasalady», – dep túsindirdi koll-ortalyq. Bank ókilderi bólimshelerdiń barlyǵy qazirgi tańda jumys istemeı turǵanyn aıtty. «Bizdiń biletimiz: tehnıkalyq irkilis týyndaǵan. Qazir qandaı da bir suraqqa jaýap bere almaımyz», – dedi qaýyrt jeliniń operatory. Derekkózge silteme jasaǵan BAQ-tyń aqparaty boıynsha, Qazınvestbank tehnıkalyq defoltqa jol bergen.  Atalmysh qarjy uıymyna  qatysty  sheshimdi dúısenbi kúni Ulttyq bank qabyldaıdy. Barshaǵa belgili, Ulttyq bank 2016 jyldyń 1 qarashasynan bastap «Qazınvestbank» AQ jáne «Delta bank» AQ-nyń  jeke tulǵalardan jańa depozıt qabyldaý, jeke tulǵalarǵa banktik esep-shot ashý lısenzııalaryn 3 aı merzimge toqtatyp qoıǵan bolatyn. Lısenzııany toqtatý týraly sheshim joǵaryda attary atalǵan bankter tarapynan jekelegen zań buzýshylyqtarǵa jáne ishki baqylaý júıesin jaqsartý qajettiligine baılanysty toqtatylǵan. Lısenzııany toqtatý jumys istep turǵan depozıtterge jáne bankter klıentterine qyzmet kórsetýge, sondaı-aq zańdy tulǵalardan depozıtter tartýǵa áser etpeıdi. 2016 jyldyń  1 qazanyndaǵy jaǵdaı boıynsha  «Qazınvestbanktiń» jeke tulǵalardan qabyldaǵan depozıt kólemi 16,4 mlrd teńge nemese  jeke tulǵalardyń depozıtiniń jalpy kóleminiń 2,3 paıyzyn qurady. KASE málimeti boıynsha, 2016  jyldyń 1 qarashasynda Qazınvestbank aksıonerleriniń quramy kelesideı boldy: Gaýhar Qapparova - 9,98%; Baǵdat Ábilqadirov, Murat Álmaǵambetov, Serik Beısenbekov, Aıdar Jaqsylyqov, Aıdos Erjanov, Nurjan Qaıyrbekov, Erjanat Qalıjanov, Lázzat Tileýbaeva árqaısysy – 9,3 %; Bella Chershnoves – 7,1%. QR Ulttyq bankiniń málimeti boıynsha, «Qazınvestbank» 2016 jylǵy qańtar-qyrkúıektiń qorytyndysy boıynsha, eldiń 34 banki arasynda aktıv kólemi boıynsha  17-oryndy ıelendi.