Toqaev Ústel tennısi federasııasynyń prezıdenti boldy

Qasym-Jomart Toqaev Ústel tennısi federasııasynyń prezıdenti bolyp saılandy, dep habarlaıdy QazAqparat. Bul týraly búgin Astanada federasııanyń kezekten tys ótken baspasóz otyrysynda belgili boldy. Bul laýazymda Qasym-Jomart Toqaevtyń aldynda Baqtyqoja Izmuhambetov bolǵan edi. Odan basqa, federasııanyń basshylyq organy saılanyp, Danııar Ábilǵazın Bas hatshy boldy. «Nátıjeli jumysqa jáne maǵan kórsetilgen senimge oraı men Konferensııaǵa qatysýshylarǵa alǵys bildiremin. Bizdiń aldymyzda tórt jyldyq jańa kezeń bastaldy. 2020 jyly Tokıoda ótetin Olımpıadadaǵy mańyzdy jarystarda synǵa túsetin bolamyz. Ústel tennısindegi nátıjelerdi jaqsartý jónindegi kúrdeli de qıyn joldardy birge baǵyndyramyz. Sondyqtan aımaqtardaǵy materıaldyq-tehnıkalyq bazany nyǵaıtý jáne aımaqtyq federasııany damytý, jattyqtyrýshylar quramynyń biliktiligin arttyrý, bizdiń sportshylardy sapaly jattyǵý jaǵdaılarymen qamtamasyz etý, halyqaralyq yntymaqtastyqty damytý jáne ústel tennısinen álemdik sport arenasynda Qazaqstan ornyn kúsheıtý qajet dep sanaımyn. Federasııanyń basty mindetteriniń biri - ústel tennısiniń elimizde keńinen qanat jaıýyn qamtamasyz etý, sporttyń osy túrine buqaralyq sıpat berý bolyp tabylady. Sondaı-aq ústel tennısin damytý salasynda ozyq tájirıbelermen almasýdy uıymdastyrý da mańyzdy», - dep atap ótti Q.Toqaev. Konferensııaǵa qatysýshylar Qazaqstandaǵy osy sport túrin damytýdyń qazirgi kezdegi ózekti máselelerin talqylady. Sondaı-aq konferensııada federasııanyń atqarý komıtetiniń jańa quramy bekitildi. Esterińizge sala keteıik, bıyl Qazaqstan ústel tennısinen tuńǵysh ret Olımpıada oıyndaryna joldama jeńip alǵan bolatyn. Rıo-de-Janeıroda Qazaqstan atynan Kırıll Gerasımenko saıysqa túsken. Alaıda, júldeli oryndardan kórine almady.