Ilın balalar úıiniń tárbıelenýshisine kómek berdi

Belgili qazaqstandyq sportshy Ilıa Ilın Astana qalasyndaǵy balalar úıiniń tárbıelenýshisi Vladımır Mıgýnovqa bilim berý depozıtin ashty. Bul týraly vesti.kz habarlady. Ilınniń aıtýynsha, mundaı ıgi is ony erekshe sezimge bólep otyr ári aldaǵy ýaqytta 13 jastaǵy balamen tyǵyz qarym-qatynasta bolady. «Áriptesterimniń mundaı isti bastaǵanyn estip, qýana-qýana qatysyp otyrmyn. Ne sebepti? Birinshiden, jastarǵa qoldaý kórsetý kerek. Ásirese, aldyna maqsat qoıyp, bıikke umtylǵysy keletin búldirshinderge materıaldyq jaǵynan kómek berýimiz qajet. Vladımırmen tanysyp, kishkene de bolsyn qol ushymdy berýdi jón kórdim. Balaqaıǵa qarap-aq bolashaǵy zor ekenin baıqaýǵa bolady», – dedi Ilın. Aǵalyq sezimge bólengen sportshy Vladımırge aldaǵy ýaqytta da kómek kórsetetinin jasyrmady. «Álemge áıgili basketbolshylardyń biri bolyp, Otanyma qyzmet etýdi armandaımyn. Ilıa Ilınmen jaqyn tanysqanyma qýanyshtymyn. Sport pen sabaǵymdy qatar alyp júrý maǵan esh kedergi keltirmeıdi», – dedi búldirshin. «Aldyńda synaqqa toly ómir kútip tur. Sportshy bolý úshin kún-tún talmaı jattyǵýyń kerek. Shet tilderin kóbirek meńger. Saǵan ómirlik tájirıbemmen jıi bólisip turamyn», – dedi Ilın. Aıta keteıik, depozıttiń alǵashqy tólemi 50 myń teńgeni qurady. Buǵan deıin osy aksııaǵa Rıo Olımpıadasynyń kúmis júldegeri Vasılıı Levıt qatysyp, Altynbek Baǵybergenovtiń atyna depozıt ashqan.