Dzıýdodan ulttyq qurama bıyl 59 medal aldy

2016 jyl qazaqstandyq dzıýdoshylar úshin tabysty jyl boldy. Bir jylda eki Álem Chempıony, eń bastysy, tórt jyldyqtyń basty básekesinde eki medaldi qanjyǵaǵa baılandy, dep habarlady Dzıýdo federasııasynyń baspasóz qyzmeti. Bul Qazaqstan dzıýdo tarıhynda altyn áriptermen jazylatyn jetistik. Eldos Smetov - Olımpıada oıyndarynda dzıýdodan Ashat Jitkeevtiń erligin qaıtalap, kúmis medalǵa  qol jetkizse,  Galbadrah Otgonseseg – dzıýdodan Olımpıada oıyndarynda júldeger atanǵan alǵashqy qazaqstandyq áıel sportshy atandy. Olımpıadadan  bólek, sportshylarymyz Álem Chempıonatynda da medalmen oraldy.  Atap aıtar bolsaq, Kıntonov Mýrat – ardagerler arasynda Álem Chempıony atansa, Ǵusman Qyrǵyzbaev – áskerıler arasyndaǵy Álem Chempıonatynda altynnan alqa taǵynyp, el namysyn abyroımen qorǵady. Qurlyqtyq chempıonatta da dzıýdoshylarymyz júldesiz qalmady. О́zbekstan astanasy Tashkent qalasynda 3 altyn, 2 kúmis, 4 qolamen ulttyq qurama komandalyq esepte Azııa Chempıonatyn III orynmen aıaqtady. Bul synda Eldos Smetov (60 kg), Otgonseseg Galbadrah (48 kg) jáne Marıan Ýrdabaeva (63 kg) chempıon atanyp, jalaýymyzdy jelbiretken bolatyn. Bıyl eresekterden Qazaqstan Ulttyq quramasy IJF kúntizbesindegi barlyq iri jarystarǵa qatysyp, 2016 jyly 35 medalǵa qol jetkizdi. Onyń 10-y altyn, 12-si kúmis jáne 13-i qola.