Bıyl Shyǵys óńirinde Máýlit merekesi keńinen atalyp ótti. Ásirese, oblys ortalyǵyndaǵy Metallýrgterdiń mádenıet saraıynda ótken "Rahmet nury" atty rýhanı kesh óskemendikterdiń óz-ózine ózgeshe qaraǵan, Jaratýshyǵa jaqyndaı túsken sharaǵa aınaldy. Qazaqstan musylmandary dinı basqarmasynyń ardaqty Muhammed paıǵambarymyz (s.ǵ.s) ómirge kelgen Máýlit aıynda keń kólemde rýhanı sharalar uıymdastyrý jónindegi tapsyrmasy aıasynda О́skemen aımaǵy ókildigi ótkizgen rýhanı keshke aýdan men qala ımamdary, aqsaqaldar, zııaly qaýym ókilderi, memlekettik qyzmetkerler jáne jastar keldi.
Eldiń eńseli saraıǵa tolassyz aǵylýynan-aq olardyń osynaý qasıetti aıǵa degen saǵynyshyn, Alla Elshisine degen izgi qurmetin kórýge bolady. Alys aýdandardan, qala syrtyndaǵy aýyldardan kelýshiler úshin ókildikten arnaıy tegin kólik uıymdastyryldy.
Jıyn qasıetti Quran oqýmen bastalyp, ardaqty paıǵambar ómiri men izgi amaldary, sonymen qatar О́skemen ókildiginiń aǵymdaǵy jyly atqarǵan sharalarynyń esebi sahnadaǵy ekrannan usynyldy.
QMDB-nyń О́skemen aımaǵy boıynsha ókil ımamy, Halıfa Altaı atyndaǵy Shyǵys Qazaqstan oblystyq meshitiniń bas ımamy Ermek qajy Tasbolatuly óńir jurtshylyǵyn Máýlit merekesimen quttyqtady. Máýlit merekesiniń mańyzy men tarıhyna toqtalǵan ol: «Paıǵambarymyzdyń ónegeli ómiri men taǵylymy – sarqylmas rýhanı qazyna. Qazaq eli qashannan paıǵambarymyzdy joǵary kóterip, syılap, qurmettegen, jaqsy kórgen. Izgi qasıetterin dástúrimiz ben ádet-ǵurpymyzǵa engizgen. Biz dindi tildiń ushyna emes, dildiń ishine ornatqan halyqpyz! Ornatyp qana qoımaı, amalǵa aınaldyrǵan halyqpyz. Osyny jete túsinýimiz kerek", dedi.
Bul keshte sahnaǵa óńirde alǵash ret qurylǵan máýlit oqıtyn toptyń jas óren shákirtteri shyǵyp, Muhammed paıǵambarǵa (s.ǵ.s) máýlit oqyp, salaýat aıtty. Sondaı-aq oblystaǵy tanymal ónerpazdar áýelete ásem án shyrqap, kúmbirlete kúı tókti. Iirimi tereń, tyńdaýshysyn áserli oıǵa jeteleıtin termelermen dinı ánder shyrqaldy. О́skemen qalasyndaǵy joǵarǵy oqý oryndarynyń ónerli stýdent jastary búgingi qoǵam ómirinen kórinister qoıdy.
Rýhanı kesh barysynda óńirde nátıjeli qyzmet atqaryp kele jatqan ımamdar marapattaldy. Merekelik shara aıasynda ókildiktiń atqarǵan sharalary boıynsha aýqymdy foto jáne ulttyq jádigerler kórmesi uıymdastyryldy. Sonymen qatar kóne Quran kitaptarynyń kórmesi usynyldy. Turǵyndar Máýlit merekesin joǵarǵy deńgeıde uıymdastyrǵan О́skemen aımaǵy ókildigine rızashylyq bildirdi.
Dýman ANASh, "Egemen Qazaqstan"
О́SKEMEN.
