Zerendi aýdanyndaǵy Aqkól aýyldyq okrýginiń ákimi Talǵat Muhamedjanov Ivanovkaǵa mynadaı sıpattama beredi: «Keshegi daǵdarysty jyldarda turǵyndar kóshin toqtatýǵa múmkindik bolmady. Tarıhı otandaryna qonys aýdarǵandardy bylaı qoıǵanda, ózimizdiń jerlesterimiz kórshi aýyldarǵa, Kókshetaý men Astanaǵa aǵylyp jatty. Qaraýsyz úılerdi buzyp-jaryp, qurylys materıaly qylǵandaryn, osynda qalǵan sanaýly azamattar otynǵa paıdalanǵanyn jasyra almaımyn. Ýaqyt óte es jıdyq. Aýyldyń eńsesin Úkimet kóterdi. «О́ńirlerdi damytý» memleket-tik baǵdarlamasymen ortalyqtandyrylǵan sý júıesi tartyldy, aýylishilik joldar salyndy. Bastaýysh mektep ashyldy. Shaǵyn jáne orta bıznesti órkendetýge ózek tartylyp, jumys oryndary quryldy. Aınalasy on shaqty jyldyń ishinde 71 úıdiń oty jaǵylǵany shyndyqqa aınaldy». Talǵatqa qosylyp tebirenip biz otyrmyz. Jańaǵy 71 úıdiń «ishi janǵa, qorasy malǵa tolsyn» degen qazaqı uly tilektiń qabyl bolǵany qandaı jaqsy! Táýelsizdik sharapaty degenimiz osy. Bir jaǵynan, osy sharapattyń mánin uǵynyp, alǵa umtylyp, iske jaratqan azamattarǵa rıza bolasyń. Solardyń qatarynda Kúterbekovterdiń otbasy da bar. Bular qaladan aýylǵa kóshkender. Erli-zaıypty Bolat pen Jańyldyń ekeýi de kooperatıv tehnıkýmyn bitirip, qoǵamdyq tamaqtandyrý jáne saýda salasynda qyzmet etken. Daǵdarys daýyly kele-kele óz óktemdigin jasady. Jumyssyzdyq. Jas mamandardyń janyna osy batqan. Bular eńbeksiz otyra almaıtyndardan edi. Bolat Kúterbekov jeti balanyń kenjesi, ákesi qaıtys bolǵanda qursaqta qalǵan. Al Jańyl Elýbaıqyzy – apaly-sińlili toǵyz qyzdyń tórtinshisi. Qaınaǵan qazaq aýylynyń túlekteri... Tabıǵatynan tuıyqtaý Bolattyń únsiz oılanýy kóbeıip ketken kúnder edi. Aqyrynda, aǵaıyndarymen aqyldasqan jospary júzege asqan ol, eki balamen úıde otyrǵan Jańylǵa «Al kóshtik Ivanovkaǵa» deıdi. Jańadan jeke kásipshilik ashyp, oǵan qyzdary Aıshanyń esimin beripti. Eń bastysy, jeke kásipkerlikti Jańyldyń atyna rásimdegen. Buny otbasylyq saıasattyń utymdy túri deı alamyz. Jańyl «janyp» ketti. Qaltaǵa kelerlik úıdiń 40 sotyq jeri bar eken. Kartop ekti, qyzanaq, qııar ósirdi. Eki sıyr satyp alyp, qorada qaz-úırekter qańqyldady. Úıdi keńeıtip, qora-qopsy saldy. Bul – 2004 jyl. 2015 jyly iri qara 25-ke, qoı basy júzge jetti. Azdap jylqy da bar. Tynymsyz eńbektiń jemisi degenimiz osy. Bıyl sharýashylyǵyn ári qaraı keńeıtý úshin Jańyl «Aýyl sharýashylyǵyn qarjylaı qoldaý qory» AQ Aqmola oblystyq fılıalyna ótinish bergen. Bıznes-jospary maquldanyp, qarashada «Jumyspen qamtýdyń jol kartasy-2020» baǵdarlamasymen 3 mıllıon teńge nesıe aldy. Jyldyq ústemesi 6 paıyz ǵana. Osynyń arqasynda «Aıshanyń» tabyny taǵy 14 bas qunajynmen tolyqty. Qalǵan 270 myń teńgege qosymsha mal azyǵy jetkizilgen. Osy sıyrlardyń alǵashqysy buzaýlapty. Jańyl onyń qasynda «tompaǵym» dep aınalyp-tolǵanyp júr.
Kásipker áıeldiń jankeshtiligin aıtsańyzshy. О́z aýzynan estidik, ol tańǵy saýynnyń 150 lıtr sútin Kókshetaýdyń sút zaýyty men «Esil-Agro» JShS-ǵa ótkizedi eken. Qolmen saýady. Bir jaqsysy, álgi kásiporyndar mashınasyn jiberip, qabyldap alady. Lıtri 60 teńgeden. Al keshki saýynnyń sútin ótkizbeıdi. Maı shaıqap, qaımaq bylǵaıdy, qurt, irimshik jasaıdy. Bulardy jınaqtap, Astananyń naryǵyna shyǵaratyn kórinedi. Onyń ústine atshaptyrym úıin sypyryp-sıyryp, shyraıyn keltirip otyr. Bárine úlgerýge bolady eken-aý deısiń tańyrqap. – Árıne, kómekshim bar, – deıdi Jańyl ishki kúmánimizdi seıiltpek keıippen. – Biz Kókshetaýda turǵan kezimizde qaladaǵy arnaıy mektep-ınternattan Volodıa Peresýnko deıtin jetim balany tárbıege alǵanbyz. О́zimizdiń Jumabek, Aıshamen oınap-kúlip ósti. Qulaǵy estimeıdi demeseńiz, óte adal, elgezek, eńbekqor jan. Kámeletke tolǵan soń pikirin suraǵanymyzda, osynda qalamyn dedi. Baýyr basyp qalǵanbyz, qatty qýandyq. Úıdegi eki traktorda qatar isteıdi. Aldyńǵy jyly kóńili kóterilip júrsin dep «Mersedes» jeńil kóligin alyp berdik. Bizdi «papa», «mama» deıdi. Qazir Astanadaǵy aýyl sharýashylyǵy ýnıversıtetiniń sońǵy kýrsynda oqıtyn Jumabekpen, kolledjge byltyr túsken Aıshamen kompıýter arqyly habarlasyp turady. Kórshi úıge de kirip shyqtyq. Taǵdyr taýqymetin kórgen jandardyń jeti balasy bar eken. Bolat olarǵa úı berip, kóshirip alǵan. Aldyna mal salyp, isher-jemin qamtamasyz etip otyr. Eńbekaqy tóleıdi. Mine, mundaı jandardyń ósip-órkendemeýi múmkin emes. Qoshtasar sátte, ádettegideı, Kúterbekovterden bolashaq josparlary jaıly suraǵanbyz. Bar múmkindikti salyp, nesıeden merziminen buryn qutylýdy oılaıdy eken. Ondaǵysy taǵy da nesıege qol jetkizý. Birinshiden, keminde 500 lıtrlik sút saqtaıtyn jabdyq satyp alý kerek. Bul ónimdi qaıta óńdeýge septigin tıgizedi. Odan keıin Omby jáne Petropavl aınalma jolynda jol boıy bıznesin ashý. Bıznes-jospar daıyn. Amandyq bolsa, jańa dámhana, tehnıkalyq qyzmet stansasy, monshanyń ashylar sáti alys emes sııaqty.
Baqbergen AMALBEK,
«Egemen Qazaqstan»
Aqmola oblysy, Zerendi aýdany
