Shildeden bastap eń az zeınetaqy 45 711 teńge bolady

QR Densaýlyq saqtaý jáne áleýmettik damý mınıstri Tamara Dúısenova bala týýyna baılanysty beriletin járdemaqy men zeınetaqy mólsheriniń 2017 jyly artýy týraly naqty túsindirme berdi, dep habarlaıdy atalǵan vedomstvonyń baspasóz qyzmeti. QR DSÁDM basshysy QR Qarjy mınıstrligimen birlesip júrgizilgen esepti eskere otyryp, 2017 jylǵy 1 shildeden bastap bazalyq jáne yntymaqty zeınetaqy mólsheriniń 20%-ǵa ósetinin habarlady. «2017-2019 jyldarǵa arnalǵan bıýdjetke sáıkes, yntymaqty zeınetaqynyń mólsheri 2017 jylǵy 1 qańtardan bastap 9%-ǵa, Memleket basshysynyń tapsyrmasyn oryndaý maqsatynda 2017 jyldyń 1 shildesinen taǵy da 11%-ǵa ulǵaıtylady. Máselen, eger yntymaqty zeınetaqy mólsheri 2016 jyly 40 000 teńge bolsa, 2017 jyldyń 1 qańtarynan bastap 9%-ǵa arttyrylyp, 43 600 teńgeni quraıtyn bolady. 2017 jyldyń 1 shildesinen bastap taǵy 11%-ǵa ulǵaıtylyp, jalpy mólsheri 48 396 teńge bolady. Osylaısha, 2017 jyly yntymaqty zeınetaqy mólsheri 2016 jylmen salystyrǵanda 20%-ǵa ulǵaıtylmaq. Bazalyq zeınetaqy 2017 jylǵy 1 qańtardan 7%-ǵa, Memleket basshysynyń tapsyrmasyn oryndaý maqsatynda 2017 jyldyń 1 shildesinen taǵy da 13%-ǵa ulǵaıtylady. Máselen, aǵymdaǵy jyly eger bazalyq zeınetaqy mólsheri 11 965 teńge bolsa, 2017 jyldyń 1 qańtarynan bastap 7%-ǵa arttyrylyp, 12 802 teńgeni quraıtyn bolady. 2017 jyldyń 1 shildesinen bastap taǵy 13%-ǵa ulǵaıtylyp, jalpy mólsheri 14 466 teńge bolady. Osylaısha, 2017 jyly bazalyq zeınetaqy mólsheri 2016 jylmen salystyrǵanda 20%-ǵa arttyrylady», - dep habarlady Tamara Dúısenova. Sonymen qatar, Mınıstr 2,1 mln-ǵa jýyq zeınetkerdiń zeınetaqysyn arttyrý maqsatynda respýblıkalyq bıýdjetten qosymsha 79,8 mlrd. teńge bólinetinin atap aıtty. Joǵaryda atalǵan ózgeristerdi eskere otyryp, zeınetaqynyń eń tómengi mólsheri (bazalyq zeınetaqyny eseptegende) 2016 jylǵy 37 789 teńgeden 2017 jylǵy 1 shildede 45 711 teńgege artady. Zeınetaqynyń ortasha mólsheri (bazalyq zeınetaqyny eseptegende) 55 154 teńgeden 66 721 teńgege deıin ulǵaıady. Bala týýyna baılanysty beriletin bir jolǵy memlekettik járdemaqy mólsheri 2017 jylǵy 1 qańtardan 7%-ǵa, al 2017 jylǵy 1 shildeden taǵy 20%-ǵa arttyrylady. Nátıjesinde 2017 jyly 2016 jylmen salystyrǵanda ósim 27%-dy quraıtyn bolady. «Eger aǵymdaǵy jyly birinshi, ekinshi, úshinshi balanyń týýyna baılanysty beriletin bir jolǵy memlekettik járdemaqy mólsheri 66 621 teńge bolsa,  2017 jylǵy 1 qańtarda 71 270 teńge bolyp, 1 shildede 86 222 teńgege deıin artpaq. Aǵymdaǵy jyly tórtinshi balanyń týýyna baılanysty beriletin bir jolǵy memlekettik járdemaqy mólsheri 111 035 teńge bolsa, 2017 jylǵy 1 qańtarda 118 myń teńge bolyp, 1 shildede 142 947  teńgeni quramaq», - dep túsindirdi Tamara Dúısenova. Osy maqsattarǵa respýblıkalyq bıýdjetten kelesi jyly qosymsha 1,8 mlrd. teńge bólinedi. Jalpy alǵanda, joǵaryda atalǵan zeınetaqy men járdemaqy mólsherleriniń artýyna respýblıkalyq bıýdjetti naqtylaý kezinde qosymsha 81,6 mlrd. teńge qarastyrylmaq. Esterińizge sala keteıik, aǵymdaǵy jylǵy 15 jeltoqsanda QR táýelsizdiginiń 25-jyldyǵyna arnalǵan saltanatty sharada Memleket basshysy 2017 jyldyń 1 shildesinen zeınetaqynyń barlyq mólsherin 2016 jylmen salystyrǵanda 20%-ǵa, balanyń týýyna baılanysty beriletin bir jolǵy járdemaqy mólsherin 20%-ǵa arttyrýdy tapsyrǵan bolatyn.