Metıý Sımmonds jıyrma jyldan astam ýaqyt boıy tastan jáne mármárdan tarıhı eskertkishterdiń kishkentaı úlgisin jasaýmen aınalysady, dep jazady CNN.
Aǵylshyn músinshisi men art-tarıhshysy mańyzdy tarıhı eskertkishterdi qaıta qalpyna keltirý jumystarynan erekshe shabyt alyp, osy salany tańdaǵan. Ol 1984 jyly óner tarıhy boıynsha akademııalyq bilim alyp, orta ǵasyrdyń arhıtektýrasyna mamandanǵan. 1991 jyly tas kesý ónerin meńgerip, sol jyly Ulybrıtanııanyń birneshe tarıhı eskertkishterin restavrasııalaý jumystaryna qatysqan. 1996 jyly Italııaǵa kóship baryp, mármárdi kesý ónerin meńgeredi. Ol Qytaı, AQSh, Italııada ótken kóptegen halyqaralyq konkýrstarda jeńiske jetken.
"Men belgili bir ǵımaratty salýdy maqsat tutpaımyn. Kóbinese tarıhı kezeńdi tasta órnektegim keledi. Ǵımaratqa qarap, solardyń tilinde sóılep, ózimniń kórgenderimdi, uqqandarymdy beıneleýge tyrysamyn", deıdi ol.
CNN-ge bergen suhbatynda músinshi tasqa degen kózqarasy erekshe ekenin aıtady. "Adamzat óz tarıhynda o bastan ómir súrý salty men kezeńderdi tasta beınelegen. Iаǵnı, bul tarıhty bolashaqqa jetkizý úshin taptyrmas qural. Álemdegi mádenıettiń bir túri. Ony tabıǵat ózi jasaǵan. Biz tastar arqyly tarıhty beıneleı alamyz", deıdi Sımmonds.
Jýrnalıstiń músinderdi jasaýǵa qansha ýaqyt ketedi degen suraǵyna ol jumys tastyń ólshemine baılanysty ekenin aıtady. "Mysaly, kishkentaı tastar 2 apta, arhıtektýralyq týyndy kúrdeli bolsa nemese tas úlken bolsa, birneshe aı ýaqytym ketýi múmkin", deıdi músinshi. Sonymen qatar ol aldymen sol kezeń mádenıetin zertteıtinin de tilge tıek etipti. Iаǵnı, tarıhı kezeńdi jan-jaqty qarastyryp, sol eskertkish týraly oqyp, izdenýi úshin keıde bir jyl ýaqyty ketedi eken.
