Búgin, 4 qańtarda Qazaqstan Respýblıkasy Premer-Mınıstriniń orynbasary, 28-shi Dúnıejúzilik qysqy Ýnıversıada-2017 uıymdastyrý komıtetiniń tóraǵasy Imanǵalı Tasmaǵambetov Almaty qalasyndaǵy aýqymdy sporttyq sharany ótkizýdegi nysandardyń sońǵy daıyndyǵyn tekserip, kóshpeli keńes ótkizdi, dep habarlaıdy primeminister.kz.
Ýnıversıadaǵa daıyndyq jumystary aıaqtalýǵa taıady. Bul óz kezeginde barlyq qyzmetter tarapynan muqııat tekserýdi qajet etedi. Kólik qyzmeti men jol qaýipsizdigin saqtaý - osy baǵyttaǵy jumystyń jaýapty bóligi sanalady.
«Kólik logıstıkasyn uıymdastyrýǵa kelsek, onda bizdiń EQYU Sammıtine jáne 2011 jylǵy qysqy Azııa oıyndaryna daıyndyqty júrgizýde tájirıbemiz bar. Muny delegattarǵa, sporttyq komandalarǵa qyzmet kórsetýde qoldanýǵa bolady. Buǵan qaramastan, alaý estafetasyn ótkizý kezinde kólik qozǵalysynyń artýyna baılanysty basqa da suraqtar týyndaıdy. Bul oraıda, elimizdegi qalalardyń, onyń ishinde Astana men Almaty qalalarynyń turǵyndary úshin qolaısyzdyqtar týdyrmaý maqsatynda kólik qozǵalysyn retteýge qosymsha sharalar qabyldaý qajet», - dedi vıse-premer kóshpeli keńeste.
Sporttyq ǵımarattardyń daıyndyǵyna qatysty Imanǵalı Tasmaǵambetov negizgi nysandardaǵy jumystardyń aıaqtalǵanyn eskere otyryp, olardy belgilengen talaptar men standarttarǵa jáne paıdalanýǵa berý qaýipsizdigine sáıkes tolyq jabdyqtaý qajettigin eskertti. Sonymen qatar, vıse-premer daıyndyq jumystarynyń jaqsy júrgizilip otyrǵanyn aıta kele, Almaty qalasynyń ákimi Baýyrjan Baıbekke quzyrly qalalyq vedomstvolar men qyzmettermen birlesip qalyń kópshiliktiń qatysýymen ótetin nysandardy paıdalaný erejesi men qaýipsizdik talaptaryn mindetti oryndaý boıynsha jumysshy komıssııalardy ótkizýdi tapsyrdy.
Sondaı-aq, QR Premer-Mınıstriniń orynbasary qysqy Ýnıversıadanyń uıymdastyrý komıteti ókilderiniń qatysýymen jarystar ótkiziletin árbir nysannyń fýnksıonaldyq talaptarynyń oryndalý máselelerin pysyqtaý mindetin qoıdy. Jańa sport ǵımarattaryna irgeles aýmaqty kógaldandyrý jáne abattandyrý jobasyna sáıkes abattandyrý, jaryqtandyrý, bezendirý jumystaryn oryndaý jáne kólik turaqtaryn jabdyqtaý tapsyryldy.
