Búgin qazaqstandyq kınoteatrlarda jazýshy Ilııas Esenberlınniń «Kóshpendiler» trılogııasy boıynsha túsirilgen «Qazaq eli» jobasynyń alǵashqy bólimi – «Almas qylysh» fılmi kórsetile bastady, dep habarlaıdy QazAqparat.
Fılm ssenarııin jazǵan – Smaǵul Elýbaı. Onda Ilııas Esenberlınniń «Almas qylysh» romany negizge alyndy. Rejısser Rústem Ábdirashevtyń aıtýynsha, «Almas qylyshty» túsirýge eki jyl ýaqyt ketken. Fılmdi túsirý jumystaryna myńdaǵan adam tartylǵan. Fılmniń túpnusqasy tolyǵymen qazaq tilinde, arasynda jońǵar tilinde jáne soltústik mońǵol dıalektisi bar. Prokatqa orys tildi nusqasy da ázirlendi.
«Bizde materıaldyń úlken qory jınaqtaldy. Sondyqtan fılmniń jalǵasy mindetti túrde bolady», – deıdi R.Ábdirashev.
Tarıhı jobanyń avtory – QR Prezıdenti N. Nazarbaev. Fılm QR Mádenıet jáne sport mınıstrliginiń tapsyrysy boıynsha Sh.Aımanov atyndaǵy «Qazaqfılm» AQ «Centaurus Rustem Abdrashev production» JShS-niń qatysýymen túsirilgen.
Aıta keteıik, buǵan deıin «Almas qylysh» fılminiń tusaýkeser kórsetilimi Astana men Almaty qalalarynda ótken. Oǵan qatysqandardyń barlyǵy jańa kınotýyndyǵa joǵary baǵa bergen. Prezıdent Nursultan Nazarbaev ta atalǵan fılmdi «qazaq halqynyń ulttyq sana-sezimin kóteretin týyndy» dep baǵalady.
