«Áýlıe-Ata» halyqaralyq áýejaıy tarıfterin ulǵaıtty

Tarazda «Halyqaralyq «Áýlıe Ata» áýejaıy» AQ-nyń ushý, otyrǵyzý, áýe qaýipsizdigin qamtamasyz etý jumystarynyń tarıfterin bekitý jónindegi ótinishine baılanysty qoǵamdyq tyńdaý ótti, dep habarlaıdy QR Tabıǵı monopolııalardy retteý agenttiginiń Jambyl oblysy boıynsha departamenti. Aıta keteıik, QR Kólik jáne kommýnıkasııa mınıstrliginiń qarjylandyrýymen ushý-qoný alańy qaıta jóndeýden ótip, qurylys jumystary 2013 jyly aıaqtaldy. Osydan keıin Taraz áýejaıy zamanaýı ushaqtar men tikushaqtardyń barlyq túrlerin qabyldaı alatyn boldy. Aýa raıynyń kúrdeliligine qaraı jaryqtandyrǵysh qurylǵylary da jańartyldy. Endi «Áýlıe Ata» halyqaralyq áýejaıy aerodrom tehnıkasynyń sany, qyzmetkerlerdiń biliktiligi jaǵynan zamanǵa saı áýe baılanysyna aınaldy. Áýejaıda Eýropa, Ortalyq jáne ońtústik-Shyǵys Azııamen baılanys ornatylǵan. «Halyqaralyq «Áýlıe Ata» áýejaıy» AQ qyzmetiniń tarıfteri 2011 jyldan beri kóterilmegen. Jolaýshylardy otyrǵyzý, ushýdy qamtamasyz etý sharalary QQS-yn eseptemegende ushý massasynyń tonnasyna 1 414 teńgeni quraǵan. Jańa tarıf joba boıynsha 6 372,24 teńgeni quraýy kerek. Burynǵy áýe qaýipsizdiginiń ortasha-bosatý tarıfi QQS-syz ushý massasynyń tonnasyna 505 teńge bolǵan bolsa, endi ol 2 392 myń teńge bolmaq. Baǵany kóterýge májbúrlegen sharttardyń ishinde materıaldarǵa, janar-jaǵar maıǵa degen baǵanyń ósýi, aılyq jalaqynyń artýy, amortızasııa, jaryqen belgi berý qurylǵy men arnaıy tehnıkanyń jóndeý jumystary bar. QR Tabıǵı monopolııalardy retteý agenttiginiń Jambyl oblysy boıynsha ókildiginiń qyzmetkerleri jańa tarıfterdiń 2017 jyldan bastap engizilýi múmkindigin atap ótti.