18 jastaǵy máskeýlik Vıktorııa Andreeva áleýmettik jelide óz qatarlastarymen qazaqsha sóılesip, til úırenip júr. Ol Batyrhan Shúkenovtiń "Otan Ana" ánin estigen soń qazaq tilin úırenýdi maqsat etti, dep jazady
"Evrıka" gazeti.
Vıktorııanyń kózi tolyq kórmeıdi. Zaǵıptarǵa arnalǵan mektepte oqıtyn boıjetken birneshe jyl buryn áleýmettik jelide Qazaqstandaǵy qatarlastarymen tildesip, olardan Qaırat Nurtastyń ózine unaǵan ánderin úırenipti.
"Ol kezde qatty áser etpedi. Al Batyrhan Shúkenovtiń "Otan Ana" ánin tyńdaǵan kezde erekshe sezimde boldym. Meniń sol kezde ne sezingenimdi sózben aıtyp jetkizý múmkin emes. Bul adamnyń qazir ómirde joq ekeni ókinishti. "Otan Ana" áni erekshe sıqyrǵa ıe sekildi. Menińshe, Batyrhan Otanyna degen mahabbatyn aıtqan. Sol sezim maǵan de berilgen sekildi. Osy sátten keıin qazaq tilin úırenýge degen qushtarlyǵym artty. Sóıtip, osy tildi úırenýge den qoıa bastadym", deıdi Vıktorııa.
Máskeýlik qyzdyń aıtýynsha, ol soyle.kz saıty arqyly til úırene bastaǵan. Keıinnen grafıkalyq elementterge baılanysty atalǵan saıt zaǵıp jandarǵa qoljetimsiz bolady. "Jańa tolqyn" kýrsy da óziniń yńǵaıyna beıimdelmegendikten, Vıktorııa áleýmettik jeli arqyly ózine til úırenýge kómektesetin adam izdeıdi. Qazir oǵan til meńgerý úshin aqtóbelik qatarlasy kómektesip júr eken.
Búginde Vıktorııa qazaq tilinde ózi týraly áńgimelep bere alady. Biraq onyń armany - erkin sóıleý, fılmder kórip, ánderdi aýdarý.
"Men Aldar Kóse ertegisiniń keıipkerlerin bilemin. "Qyz Jibek" fılmin kórdim. Zamanaýı estradadan bólek Ámire Qashaýbaev, Shámshi Qaldaıaqovtyń ánderin tyńdadym. Muqaǵalı Maqataevtyń óleńderin oqydym. Maǵan unady. Sózin qatty túsinbesem de, tildiń dybystalýynyń ózin erekshe jaqsy kóremin. Bul Shyǵys ekeni seziledi. Men úshin bul tańsyq", deıdi Vıktorııa Andreevna. Sonymen qatar Vıktorııa qazaqsha án tyńdaǵandy erekshe jaqsy kóredi eken. "Qazaq tili arqyly meniń án aıtýǵa qushtarlyǵym oıandy. Basynda tek tyńdap júretinmin. Keıin oılana kele, nege ózime de án salmasqa degen oı keldi. Ándi uzaq izdep, bireýin tańdap, onyń sózderin jazyp aldym. Túbinde bir nátıje shyǵar", deıdi boıjetken.
Basylymnyń aıtýynsha, máskeýlik qyz qazaq estrada ánshileriniń kópshiligin biledi. Ol Aqbota Kerimbekova, Erke Esmahan, Qaraqat Ábildına, Batyrhan Shúkenov, Dımash Qudaıbergenov, "Melo Men", "Arnaý" tobyn, "Jigitter" kvartetiniń ánderin tyńdaıdy.
Boıjetken ózine vırtýaldy álemde Qazaqstannan tek ashyq, aqkóńil, meıirimdi jandardyń jolyqqanyn aıtady. Vıktorııanyń aıtýynsha, eger de múmkindik bolsa, ol Qazaqstanǵa qýana-qýana keler edi. Sebebi súıikti tilinde adamdarmen betpe-bet tildesip, qazaqtyń ulttyq taǵamdarynyń dámin tatqysy keledi.
