EKSPO-2017 áleýmettik jaǵynan az qamtylǵandarǵa qoljetimdi bolýy qajet - Tasmaǵambetov

QR Premer-Mınıstriniń orynbasary Imanǵalı Tasmaǵambetovtiń tóraǵalyǵymen «EKSPO-2017» Halyqaralyq mamandandyrylǵan kórmesi aıasynda mádenı baǵdarlamany sapaly daıyndaý jáne ótkizý máseleleri jóninde keńes ótti. Osydan buryn berilgen tapsyrmaǵan sáıkes, Mádenıet jáne sport mınıstrligi, Astana qalasynyń ákimdigi jáne «Astana EKSPO-2017» UK» AQ birlesip kórme ótetin kezeńdegi mádenı baǵdarlamany joǵary deńgeıde uıymdastyrý máseleleri jónindegi úılesimdi jumysty kúsheıtti. Sonymen qatar, delegattar men qonaqtardyń kelýi boıynsha uıymdastyrýshylyq suraqtar jiti baqylaýǵa alyndy. Osyǵan oraı, keńes barysynda vıse-premer Astana qalasynyń ákimdigi elordanyń ınjenerlik-kóliktik ınfraqurylymyn egjeı-tegjeıli zerdeleý qajet ekenine toqtaldy. Tarqatyp aıtsaq, joldaǵy júktemeni azaıtý maqsatynda kólik aǵymyn modeldeý boıynsha qolaıly nusqalardy esepteý, qonaqtardyń kelýi jáne olardyń qaýipsiz ornalasýy boıynsha uıymdastyrýshylyq suraqtardy pysyqtaý, qonaq úı jáne basqa da mindetterge jumylýy úshin ótetin sharalardy barynsha qysqartýǵa basymdyq berdi. Sondaı-aq, Qazaqstannyń mádenıet pen sporttaǵy jetistikterin tanytý maqsatynda sheteldik jobalardy azaıtý jáne ulttyq brendti nasıhattaý qajettigi aıtyldy. «Eń mańyzdysy, biz mindetti túrde turǵyndardyń áleýmettik az qamtylǵan tobyna tegin bılet taratý máselesin pysyqtaýymyz qajet. Olar osynaý aýqymdy sharaǵa daıyndalǵan kólemdi ári qyzyqty repertýardy tikeleı ózderi tamashalap, kórý múmkindigine ıe bolýy tıis. Mine, osy suraqty erekshe baqylaýǵa alýymyz shart. Ásirese, bul qalanyń jáne mádenıet mınıstrliginiń aıasynda ótetin sharalarda eskerilýi kerek», - dedi QR Premer-Mınıstriniń orynbasary Imanǵalı Tasmaǵambetov. Búgingi tańda QR Mádenıet jáne sport mınıstrligi Astana qalasy ákimdigimen jáne «Astana EKSPO-2017» UK» aksıonerlik qoǵamymen birlesip mádenı-tanymdyq jáne sporttyq sharalardyń keshendi baǵdarlamasyn bekitti. Atap aıtqanda, qazaqtyń dástúrli ónerin kórsetý, teatrlyq-buqaralyq sharalar, halyqaralyq jobalar, kórmeler, sporttyq jáne aǵartýshylyq-taqyryptyq sharalar. Sonymen qatar, osy baǵyttaǵy barlyq qurylymdardy tııanaqty úılestirý úshin shtab quryldy. Ol Astana qalasy ákimdiginiń konveshn bıýrosy jáne «Astana EKSPO-2017» UK» aksıonerlik qoǵamy shtabymen tyǵyz baılanysta bolady. Aıta keteıik, «EKSPO-2017» Halyqaralyq mamandandyrylǵan kórmesi aıasynda demeýshilik qarajat esebinen La Skala teatrynyń gastrolin, «Qytaı ımperatory Sın Shı Hýandıdiń terrakottan jasalǵan áskeri mádenı eskertkishiniń» kórmesin, Marındik teatrynyń gastrolin, «Plasıdo Domıngo operalııasy» Halyqaralyq jas vokalıster baıqaýynyń fınalyn ótkizý, sondaı-aq, Ejelgi Mysyrdyń arheologııalyq jádigerleri kórmesin uıymdastyrý josparlanǵan.