Ulttyq akademııalyq kitaphanada ótken «Ámire Parıjde» atty kitaptyń tusaýkeserinde Mádenıet jáne sport mınıstri Arystanbek Muhamedıuly qazaqtyń tanymal dástúrli ánshisi Ámire Qashaýbaev týraly aǵylshyn tilinde kıno túsirilip jatqanyn aıtty. Onyń aıtýynsha, kórkem fılm aldaǵy maýsym aıynda jaryqqa shyǵady. Ánshi Ámireniń róline talantty jas akter Sanjar Madıev tańdap alynǵan. «Biz kórkem fılmdi dúnıejúzilik prokatqa daıyndap jatyrmyz. Biz Ámireni ár qazaqqa dáripteýimiz kerek. Sondaı-aq, dúnıe júzine de osyndaı dańqty adam týraly kórsetýimiz kerek. Ol ádemi adam, syrt kelbeti, júris-turysy, bolmysy kórkem adam bolǵan. Fılm aǵylshyn tilinde túsirildi. Qazaqsha dýblıajy jasalýda. Fılm amerıkalyq úlken kompanııamen birlesip túsirildi. Qazaqstan bıýdjetinen 400 mıllıon teńge bólindi. Al sheteldik kompanııa tarapynan odan da qomaqty qarajat jumsaldy» - dedi Mádenıet jáne aqparat mınıstri A.Muhamedıuly.
Ol osy sharalardyń el táýelsizdiginiń 25 jyldyǵyna, EKSPO-2017 kórmesi men dańqty ánshiniń 130 jyldyǵyna arnalatynyn baıandady. Kórkem fılm de, kitap ta ánshini tanytýda, onyń ómirindegi kóptegen derektermen tanystyrýǵa qyzmet etetinin jetkizdi. Kitap týraly mınıstr buryn esh jerde jarııalanbaǵan derekter bar ekenin aıtty. Sondaı-aq, Ámire Qashaýbaevtyń Parıjde alǵan kúmis medaliniń Ulttyq Mýzeıge tabystalatynyn jetkizdi.
Aıta keteıik, «Ámire Parıjde» kitabynyń avtory qyryq jyldan beri dańqty ánshini zerttep júrgen Qazaqstannyń eńbek sińirgen qaıratkeri, mýzyka zertteýshisi Jarqyn Shákárim.
Aıgúl SEIILOVA, «Egemen Qazaqstan»
Sýretterdi túsirgen Orynbaı BALMURAT
