Qostanaıda L.Tolstoı atyndaǵy oblystyq ámbebap kitaphanada Naýryz merekesine oraı stýdentter arasynda qazaq halqynyń dástúrleri týraly baıqaý ótti. Oǵan qaladaǵy joǵary oqý oryndarynyń, kolledjderdiń stýdentteri qatysty. Baıqaýǵa qatysqan stýdent jastar - oblystyq kitaphananyń oqyrmandary.
Jastar baıqaýdyń sharty boıynsha ózderin tanystyryp, qazaq halqynyń tusaý kesý, besikke salý, qyz uzatý, kelin túsirý sekildi salt-dástúrlerin kórsetti.
"Árıne, qazir ultymyzdyń salt-dástúrlerin kim bilmeıdi?» deýshiler de tabylady. Al jastardy áńgimege tarta kelgende bilmeıtinderi kóp bolyp shyqty. Sondyqtan osy baıqaýdy ótkizdik", - deıdi baıqaýdyń demeýshisi ári uıymdastyrýshylardyń biri «Shańyraq-Qostanaı» qoǵamdyq birlestiginiń tóraıymy Qarlyǵash Balapanova.
«Biz oqyrman jastarǵa baıqaý týraly habarlandyrý aıtqanymyzda, olar qýana kelisti. Dástúrdi jaqsy biletindikterin aıtty. Biraq halqymyzdyń umytylyp ketken dástúrleri de jeterlik eken. Olar týraly az biletinin jastar baıqaý kezinde ǵana sezdi», deıdi oblystyq ámbebap kitaphananyń sektor meńgerýshisi Záripgúl Smaǵulova.
Jastar ásirese, vıktorınalyq suraqtar kezinde kóp múdirdi. Qazaqtyń «uıqyashar, seltetkizer, qazan jarys, kóbentúp» sekildi tolyp jatqan salttary qazir baıqala bermeıtini de aıtyldy. Degenmen, jastardyń baıqaýǵa jaqsy daıyndalyp, kóp izdengeni baıqaldy. Qazylar alqasy bas júldeni Qostanaı pedagogıka ınstıtýty Fılologııa fakýltetiniń komandasy men Janar Jumabaıǵa berdi. Birinshi oryndy A.Baıtursynov atyndaǵy Qostanaı memleketik ýnıversıteti qazaq tili men ádebıeti kafedrasynyń stýdentteri komandasy men Almagúl Aqylbek, ekinshi oryndy Gýmanıtarlyq kolledj komandasy men Baljan Ánýarbek, úshinshi oryndy Qostanaı pedagogıka kolledji men Álıza Seıdahmet aldy.
Názıra Járimbetova, «Egemen Qazaqstan»
