Talqyǵa Halyqaralyq zańgerler qaýymdastyǵynyń ókilderi, halyqaralyq qatynastar salasyndaǵy sarapshylar, zańgerler men qoǵam qaıratkerleri qatysty. Qatysýshylar Prezıdent Qasym-Jomart Toqaev bastamashy bolǵan Konstıtýsııalyq reformany jáne elimizdiń bolashaq damýy úshin strategııalyq mańyzy bar jańa Ata zań jobasynyń negizgi erejelerin saralady.
Májilis depýtaty, «Halyqaralyq zańgerler qaýymdastyǵynyń» basshysy Marat Bashımovtyń aıtýynsha, jańa Konstıtýsııa jobasy azamattardyń quqy men bostandyǵyna beriletin kepildikterdi keńeıtip qana qoımaı, memleket pen qoǵam arasyndaǵy senimdi nyǵaıtýǵa baǵyttalǵan.
Marat Shıbutov: Ata zań jobasy jalpyhalyqtyq referendýmǵa shyǵarýǵa daıyn
Onyń aıtýynsha, joba erejesiniń barlyǵy adam quqy salasyndaǵy halyqaralyq standarttarǵa tolyq sáıkes keledi. Qujatty ázirleý barysynda Birikken Ulttar Uıymy men Eýropa Keńesiniń konvensııalarynda bekitilgen normalar men tásilder, sondaı-aq eýropalyq quqyq praktıkasy keńinen paıdalanylǵan.
Jıyn qorytyndysy boıynsha qatysýshylar jańa redaksııadaǵy Konstıtýsııasy jobasyn qoldaý jóninde Halyqaralyq zańgerler qaýymdastyǵynyń rezolıýsııasyn qabyldady.
Rezolıýsııa mátininde Konstıtýsııalyq komıssııa jumysynyń nátıjesinde jańa Negizgi zańnyń tutas ári logıkalyq qurylymy qalyptastyrylǵany atap ótilgen. Konstıtýsııanyń jańartylýy Preambýla men konstıtýsııalyq qurylystyń negizderinen bastap, memleket pen azamattyq qoǵam arasyndaǵy ózara is-qımyl tetikterine deıingi barlyq bólimderdi qamtıdy. Atap aıtqanda, Halyqtyq Keńes ınstıtýtyn damytý, adam quqyqtaryn qorǵaýdyń sottan tys tetikterin keńeıtý jáne memlekettik basqarý júıesin jetildirý máseleleri qarastyrylǵan.
Konstıtýsııalyq komıssııa jańa Ata zańda volonterlik qyzmet mártebesin bekitýdi qoldady
Halyqaralyq zańgerler qaýymdastyǵynyń sarapshylary 2026 jylǵy Konstıtýsııalyq reformanyń adamǵa baǵdarlanǵan, ıaǵnı adamdy, onyń quqy men bostandyǵyn, qadir-qasıetin memlekettik saıasattyń ózegine qoıatyn modelge negizdelgenin atap ótti. Adam men azamattyń negizgi quqy men bostandyǵynyń mazmuny zamanaýı talaptarǵa saı jańartylyp, olardy iske asyrýdyń jańa qyrlary ashylǵan. Sonymen qatar adam kapıtalynyń, bilimniń, ǵylym men ınnovasııanyń damýy memlekettiń strategııalyq qyzmet baǵyttary retinde aıqyndalǵan.
Rezolıýsııada kórsetilgendeı, usynylyp otyrǵan Konstıtýsııalyq reforma quqyq qorǵaý salasyndaǵy memlekettik tetikterdiń tıimdiligin arttyrýǵa, olardy árbir azamat úshin qoljetimdi ári túsinikti etýge múmkindik beredi. Jańa Konstıtýsııa jobasynyń Preambýlasynda naqty belgilengen quqyqtyq memleket qaǵıdattaryna súıenetin Konstıtýsııalyq ózgerister memleket pen qoǵam arasyndaǵy senimdi nyǵaıtýǵa, ádilettilik pen zańdylyqty qamtamasyz etýge, eldiń ornyqty damýyna baǵyttalǵan.
Qazaqstan Halyq partııasy óńirlerde Konstıtýsııalyq reforma barysyn túsindirdi
Usynylyp otyrǵan ózgeristerdiń aýqymy men mazmunyn eskere otyryp, Halyqaralyq zańgerler qaýymdastyǵy men halyqaralyq qatynastar salasyndaǵy sarapshylar Qazaqstan Respýblıkasynyń Konstıtýsııasynyń jobasyn qoldaıtynyn bildirdi. Sarapshylar bul qujattyń qazirgi zaman talaptaryna, qoǵamnyń suranystaryna, BUU-nyń adam quqyqtary salasyndaǵy halyqaralyq standarttaryna jáne elimizdiń strategııalyq damý maqsattaryna tolyq sáıkes keletinin atap ótti.
