Oblys ortalyǵyndaǵy Kórkemsýret galereıasynda kıizden jasalǵan qolóner buıymdarynyń «Kıiz álemi» atty qoldanbaly-dekoratıvtik kórmesi ashyldy. Qostanaıda kıizden jasalǵan buıymdarmen kórermenderin tańǵaldyryp júrgen sýretshiler men qolónershilerdiń Naýryz meıramy qarsańynda birinshi kórmesi ótkizilip otyr.
Qazaqstan jerinde kóshpeliler kıizdi bizdiń dáýirimizge deıingi I myńjyldyqta paıdalanǵan. Kıiz qazaq halqynyń tósenishi, kıimi, kóliginiń jabýy bolǵan. Ol adamdy qysta sýyqtan, jazda ystyqtan qorǵaǵan. Kóshpeliler qoldanǵan kıiz búginde sýretshiler men dızaınerlerdiń, qol óner sheberleriniń óz oıyn, sulýlyqty jetkizetin materıalyna aınalǵan.
«Kıiz adamdardyń turmysta qoldanýyna ekologııalyq eń taza materıal bolsa, óner adamdarynyń da qoldanýyna óte qolaıly. Ony qazirgi jańa tehnologııalarmen árleı túskende qaıtalanbas sulýlyq beredi» deıdi sýretshi, músinshi Baıan Batalova.
Kórmege qatysqan óner ıeleriniń aıtýynsha, búginde kıizden jasalmaıtyn zat joq. Kilemnen bastap, kıim, aıaq kıim, qýyrshaq pen gúlge deıin jasaýǵa bolady.
Názıra Járimbetova «Egemen Qazaqstan»
