Kókshetaýda stýdentter úıi ashyldy

El Táýelsizdiginiń 25 jyldyq mereıtoıy qarsańynda Sh.Ýálıhanov atyndaǵy Kókshetaý memlekettik ýnıversıtetiniń 310 oryndyq Stýdentter úıi paıdalanýǵa berildi. Aqmola oblysynyń ákimi Sergeı Kýlagın oqý ornynyń ujymyn aıtýly oqıǵamen arnaıy kelip quttyqtady, dep habarlady BNews.kz. Erekshe úlgidegi jańa Stýdentter úıi Elbasy N.Á.Nazarbaevtyń tikeleı tapsyrmasymen jáne QR Prezıdenti Ákimshiliginiń baqylaýymen salynǵan nysan. Bir atap óterligi, bul ǵımarat bıyl respýblıka kóleminde paıdalanýǵa berilip otyrǵan birden-bir stýdentter úıi. «El Táýelsizdiginiń 25 jyldyq mereıtoıy qarsańynda bizdiń óńirde de birneshe mańyzdy nysan iske qosylatynyn aıryqsha aıtyp ótkim keledi. Sonyń biri – stýdentter úıi ǵımaraty der edim. Qazirgi zaman talabyna saı jabdyqtalǵan, ishi men syrty estetıkalyq talǵammen salynǵan nysan qala sáýletin arttyra túsetinine senim mol. Osy ýaqyt ishinde Sh.Ýálıhanov atyndaǵy Kókshetaý memlekettik ýnıversıteti myńdaǵan joǵary bilikti mamandy daıarlap, elimizdiń bilim berý salasyna orasan zor úles qosyp otyr. Irgeli ýnıversıtet retinde qalyptasý jolynda kúrdeli jáne úlken belesterden ótti. Ýnıversıtet túlekteriniń Qazaqstan Respýblıkasy aımaqtarynda ǵana emes, sonymen qatar, taıaý jáne alys shetelderde de qyzmet atqaryp júrgenin jáne joǵary biliktilik, jaýapkershilik, bilimdarlyq qasıetterimen erekshelenetinderin úlken maqtanyshpen aıta alamyz», – deıdi óńir basshysy. Bes qabatty ǵımaratta stýdentterdiń jaıly turýyna qajetti jaǵdaılar jasalǵan: qajetti jıhazy bar eki jáne úsh oryndy, jaryq ta jaıly bólmeler, as daıyndaıtyn, kir jýyp, ony keptiretin, útikteıtin zamanaýı mashınkalar, sanıtarlyq toraptar, medısınalyq pýnkt, plazmalyq teledıdarlar, ár qabatta oqý zaldary, 50 oryndy konferens-zaly, 120 oryndy ashanasy bar jáne jyldamdyǵy joǵary WI-FI jelisi iske qosylǵan. Budan bólek, munda kirip-shyqqandardy baqylap, basqarý júıesi elektrondy-tehnıkalyq qyzmeti ornatylǵan. Bul júıeniń artyqshylyǵy – stýdentterdiń ata-analarynyń óz úılerinde otyryp-aq, balalarynyń sabaqqa qatysýy men oqý úlgerimin, sondaı-aq jataqhanaǵa kirip-shyǵýyn tikeleı baqylaýyn qamtamasyz etedi.