Jańa baǵyttaǵy áýe reısi ashylady

2017 jyldyń sońynda ne 2018 jyly Astana men Tel-Avıv arasynda tikeleı áýe reısi ashylatyn bolady. Bul týraly búgin Qazaqstan-Izraıl saýda-ekonomıkalyq yntymaqtastyǵy jónindegi 7-shi otyrys barysynda Investısııalar jáne damý mınıstrliginiń Azamattyq avıasııa komıteti tóraǵasynyń orynbasary Talǵat Lastaev málim etti, dep habarlaıdy QazAqparat. Onyń atap ótýinshe, 1995 jyly eki eldiń arasyndaǵy kelisimge sáıkes Almaty men Tel-Avıv arasynda tikeleı áýe reısi ashylǵan. Endigi ýaqytta Qazaqstan taraby dál osyndaı reısti Astana men Tel-Avıv arasynda ashýǵa nıetti. «Bizdiń taraptan Premer-Mınıstrdiń (Izraıl úkimet basshysy B.Netanıahý aǵymdaǵy jyldyń jeltoqsan aıynyń ortasynda Qazaqstanǵa saparmen keledi dep kútilýde - avtor) sapary aıasynda jańa qujatqa qol qoıyp, oǵan Astanany qosý jáne ruqsat etilgen reıs sanyn kórsetý jaıynda usynys bar. Iаǵnı, ushýlardy bastaýǵa quqyqtyq baza jasaý qajet. Biz osyndaı usynys jasaımyz jáne sapar aıasynda qol qoıýǵa daıynbyz», - dedi ol. Lastaevtyń sózine qaraǵanda, Eır Astana kompanııasy 2017 jyldyń sońynda nemese 2018 jyldyń basynda Astana men Tel-Avıv arasynda áýe qatynasyn ornatýdy josparlaýda. «Buǵan qosa, biz EKSPO kezine birjaqty tártippen ızraıldik áýe kompanııaar úshin barlyq ushýlarǵa shekteýlerdi alyp tastaımyz. Iаǵnı, ızraıldik kompanııalar tarabynan Qazaqstanǵa ushyp kelýge nıet bolsa, onda biz ony qoldaımyz. Jobaǵa qatysty biz óz komentarııimizdi berdik, ızraıl taraby qarady, almasý boldy», - dep atap ótti Lastaev.