Aqtóbe qalasyndaǵy óziniń atyndaǵy kóshe men Asaý Baraq kóshesi qıylysyndaǵy alańda Táýelsizdiktiń 25 jyldyǵyna arnalǵan «Juldyzdy 25 jyl» sharasy aıasynda medısına ǵylymdarynyń kandıdaty, professor Ájmaǵı Smaǵulovtyń eskertkishi ashyldy.
Eskertkishti qala ákimi Ilııas Ispanov, ǵalymnyń zaıyby Márııa Aıtmaǵanbetova jáne M.Ospanov atyndaǵy Batys Qazaqstan medısınalyq ýnıversıtetiniń prorektory Tımýr Jarkenov saltanatty túrde ashty.
Saltanatty sharada sóz alǵan Tımýr Jarkenov ǵalymnyń sol kezdegi Aqtóbe memlekettik medısına ınstıtýtynda qyzmet etken jyldary respýblıkadaǵy úlgili oqý oryndarynyń qatarynan kóringenin, ózin bilimdi de bilikti basshy, sheber uıymdastyrýshy retinde tanytqanyn jetkizdi. Almaty memlekettik dárigerlerdiń bilimin jetildirý ınstıtýtynda rentgenologııa jáne radıologııa kafedrasynyń meńgerýshisi bolǵanyna, 25 jylǵa jýyq Aqtóbe memlekettik medısına ınstıtýtynyń rektory qyzmetin atqarǵanyna, onyń shákirtteriniń elimizdiń túkpir – túkpirinde, alys – jaqyn shetelderde jemisti eńbek etip jatqanyna aıryqsha toqtaldy. Joǵary oqý ornynyń materıaldyq – tehnıkalyq bazasyn nyǵaıtyp, úsh oqý korpýsyn, 4 jataqhana, profılaktorııa, stýdentterdiń demalys lagerin salǵyzǵanyn atap ótti. Sondaı – aq, osy kezeńde medbıke isi, pedıatrııa, dárigerler bilimin jetildirý fakýltetterin ashqanyn, jas ǵalymdardy daıarlaýǵa eleýli úles qosqanyn eske aldy.
Medısına salasynyń ardageri Izbasqan Aımaǵanbetov sóz alyp, eskertkish belginiń ornatylýyna muryndyq bolǵan Á.Smaǵulovtyń shákirti «Darý» ońaltý ortalyǵy» JShS dırektory Ǵalymjan Eleýdiń eńbegin atap ótti. Ǵalymnyń qyzy, medısına ǵylymdarynyń kandıdaty Ǵazıza Smaǵulova osyndaı taǵylymdy iske qoldaý kórsetken óńir basshysyna perzenttik alǵys sezimin bildirdi.
Otyz jyldan astam temirjol aýrýhanasynda dáriger bolyp eńbek etken Á.Smaǵulovtyń jary Márııa Imandosqyzy eline
adal qyzmet etken joldasynyń eńbegin baǵalap, Aqtóbe qalasynan bir kósheniń aty berilgenine eskertkish ornatýǵa atsalysqan barsha azamattarǵa, shákirtterine, qyzmettes dostaryna alǵys aıtty.
Shara barysynda ǵalymnyń eskertkishine gúl shoqtary qoıyldy.
Satybaldy SÁÝIRBAI,
«Egemen Qazaqstan».
Sýretterdi túsirgen Haıreden Raýshanov
Aqtóbe.
