Qazaqstan Qasym han tusynda uly aımaqtyq derjava boldy - Ageev

Reseı Federasııasynyń Ekonomıkalyq strategııalar ınstıtýty Qazaqstannyń damý tarıxyn zerttep, ekonomıka, tabıǵı resýrstar, syrtqy saıasat, bilim-ǵylym, áskerı daıyndyǵy, terrıtorıaldyq mártebesi jáne taǵy basqa salalardaǵy kúsh-qýatyn zerdelegen. Bul týraly osy ınstıtýttyń dırektory, professor Aleksandr Ageev "Qazaqstan Respýblıkasynyń Táýelsizdigine 25 jyl: nátıjeler, jetistikter, keleshek kókjıegi" taqyrybyndaǵy xalyqaralyq konferensııada aıtty. "Osy oraıda Táýelsizdiktiń 25 jyly - ol "memleketke 25 jyl tolyp otyr" degendi bildirmeıdi. Osyny umytpaý qajet. Memlekettiń ózine myń jyl, ǵasyrlardan da kóp. Sondyqtan ár ýaqytta Qazaqstannyń kúsh-qýaty árqalaı boldy. Máselen, Qasym xan, Esim xandardyń tusynda Qazaqstan uly aımaqtyq derjava dárejesine deıin kóterilgen. Reseı ımperııasy quramynda da ártúrli kezeńder boldy. Sosyn keńester kezinde Qazaqstan derbes memleket bolmasa da, ol memlekettiń bolǵanyn moıyndaýymyz qajet", - dedi A.Ageev. Onyń aıtýynsha, zertteýdiń on kórsetkishi boıynsha 1981 jyly Qazaqstan keńester quramynda bolsa da, aımaqtaǵy yqpaldy memleketke aınalǵan. "Al 91-shi jyly basqalarmen birge onyń dárejesi kúrt tómendep ketti. Myna jerde Qazaqstannyń perıfırııalyq memleket bolǵany jaıynda aıtyp jatyr. Men ózim bul pikirmen kelispeımin. Sebebi ol keńester quramyndaǵy oq boıy ozyq elderdiń biri edi. Iá, Baıqońyr, ýran jáne taǵy basqa sırek metaldar polıgondary Máskeýdiń qaramaǵynda boldy. Degenmen, 91-shi jyldarǵa deıin Qazaqstan jetekshi óndiristik-agrarlyq memleket bolyp qalyptasa bildi. Endi, qazirgi ýaqytpen salystyrǵanda, sizder barlyq faktorlar boıynsha úlken progress jasadyńyzdar. Bunyń bári - tamasha jetistik", - dep atap kórsetti reseılik maman. Aıta keteıik, búgingi konferensııaǵa Túrkııa, Reseı, Fınlıandııa, sondaı-aq Eýropalyq odaqtyń ókilderi qatysýda.