Búgin M.Kataev atyndaǵy oqýshylar saraıynda «Teńgeniń qurylý tarıhy» atty eski aqshalar toptamasynyń kórmesinde XVIII ǵasyrda I Petr patshanyń tusynda qoldanylǵan orys aqshasy kórsetildi, dep habarlady pavlodarnews.kz.
Sharaǵa Pavlodar qalasy № 5 orta mektebi, Pavlodar aýdany Mıchýrın balalar úıi men Rozov orta mektebiniń, Kachır aýdanynyń Federov jáne Beregovoı orta mektepteri muǵalimderiniń qolymen jınalǵan Qazaqstannyń jáne basqa da Orta Azııa memleketteriniń qundy qaǵazdary qoıyldy. Sonymen qatar, onyń ishinde Abaı Qunanbaıuly, Muhtar Áýezov, Shoqan Ýálıhanov, Ybyraı Altynsarın syndy uly tulǵalarymyzdyń sýretteri beınelengen mereıtoılyq monetalar da bar.
«Mıchýrın balalar úıiniń murajaıyna mundaı qundy jádigerlerdi 2003 jyldan jınaı bastadyq. Bizdiń qorymyzda qazaqtyń kóptegen qundy jádigerleri saqtalǵan. Búgingi kórmege elimiz Táýelsizdik alǵannan keıingi aınalymda bolǵan aqshalardyń barlyq túrin alyp keldik. Budan bólek, Keńes odaǵy kezindegi, sondaı-aq Úndistan, Iran, Amerıka, Germanııa syndy alyp elderdiń erte kezde qoldanǵan temir tıyndaryn usynyp otyrmyz», – dedi Mıchýrın balalar úıiniń tárbıeshisi Aıjan Ahmetsháripova.
XVIII ǵasyrda I Petr patshanyń tusynda qoldanylǵan orys tıynyn Pavlodar qalasyndaǵy №5 orta mekteptiń tarıh pániniń muǵalimi Vıktor Stolıarov alyp kelgen.
«Men erte kezdegi Reseı ımperııasy, Qazaqstan Respýblıkasy jáne orta Azııa memleketteriniń monetalary men qaǵaz aqshalaryn jınastyrdym. Mundaǵy eń eski moneta XIII ǵasyrǵa tıesili. Al eń eski aqsha I Petr patshanyń tusynda, ıaǵnı 1721 jyly jaryqqa shyqqan», – dedi Vıktor Stolıarov.
