Eýropalyq Damý Banki bıyl elimizge 703 mln. eýro bóldi

Ońtústik Qazaqstan oblysynyń ákimi Janseıit Túımebaev Eýropa Qaıta Qurý jáne Damý Bankiniń (EQQDB) Qazaqstandaǵy dırektory Djanet Hekmanmen kezdesti, dep habarlaıdy OQO ákiminiń baspasóz qyzmeti. Basqosýda taraptar eki jaqty birlesken jobalar jaıyn talqylap, aldaǵy josparlarymen bólisti. Alǵy sózdi bastaǵan aımaq basshysy, eń aldymen, mártebeli meımandy óńirdiń áleýmettik-ekonomıkalyq kórsetkishterimen tanystyryp, atalǵan bank ókildigimen aýyl sharýashylyǵy, kommýnaldy sharýashylyq, ınfraqurylym, avtojoldar salý men áýejaı qurylysyn júrgizý salalarynda birlese jumys isteýge nıetti ekenin jetkizdi. Úsh mıllıonǵa jýyq halqy bar óńirdegi týý kórsetkishiniń joǵary ekenin, sáıkesinshe, bul rette ınfraqurylymdyq, áleýmettik, kommýnıkasııalyq máseleler jaıy týyndaıtyny zańdy ekenine toqtalǵan ákim, atap aıtqanda, sýmen jabdyqtaý, jylýmen qamtamasyz etý, elektrmen jabdyqtaý máselesinde qarjy bólý qajettigin aıtty. «Jalpy, QR Úkimetinen túrli salalar boıynsha kóptegen qarjy bólinýde. Dese de, mundaı halyqaralyq uıymdardyń qarjysy biz úshin artyqtyq etpeıdi. Atalǵan bankpen birge bizdiń tarap Shymkent, Túrkistan, Kentaý qalalarynyń ınfraqurylymdaryn damytý boıynsha jumystar júrgizýge ázir. Bul qarjy ınstıtýtymen birlese jumys isteýdiń birinshi tıimdi tusy, teńge aınalymyn júrgizýge múmkindigimiz bar. Ekinshiden, paıyzdyq stavkasy basqa banktermen salystyrǵanda óte tómen», - dedi J.Túımebaev. О́z kezeginde, EQQDB-niń Qazaqstandaǵy dırektory Djanet Hekman aıtylǵan usynystar boıynsha yntymaqtastyq ornatýǵa daıyn ekenin jetkizdi. Kezdesý qorytyndysy boıynsha taraptar aldaǵy ýaqytta naqty usynystar negizinde jumys isteýge ýaǵdalasty. Aıta keteıik, Eýropa qaıta qurý jáne damý banki 1992 jyldan beri Qazaqstanmen baılanys ornatyp, túrli salalar negizinde jumys istep kele jatyr. Bıyldyń ózinde elimizdegi ártúrli 28 jobaǵa 703 mln. eýro kóleminde qarjy salǵan.