Pavlodar rıngi kúshtilerdi anyqtady

Pavlodarda bokstan Qazaqstan birinshiligi máresine jetti. Elimizdiń barlyq aımaǵynan kelgen bylǵary qolǵap sheberleri on salmaq boıynsha ózara myqtyny anyqtady. Senbi kúni jarystyń jartylaı fınaldyq kezdesýleri ótti. Bul jerde barlyǵyn tizbektemeı-aq, tek 56 kılodaǵy básekege toq­talsaq. Osy salmaqta baq sy­na­ǵan Qaırat Erálıev pen Ilııas Súleımenovtiń urysy jan­kúıer­lerdiń aıyzyn qandyrdy. Fınalǵa tatıtyn jekpe-jek der­siń... Jańa salmaqqa aýysqan I.Súleımenovtiń asyǵystaý qı­myl­daǵany bolmasa, jeńiske degen jigeri kópshiliktiń kóńilinen shyqty. Alǵashqy raýndta Q.Erálıev belsendilik tanytyp, birinshi nómirmen óner kórsetti. Al kele­si kezeńde Súleımenov joıqyn soq­qylarymen tarazy basyn teńes­tirgendeı edi. Áıtkenmen, sońǵy raýndta kópten beri osy salmaqta ysylǵan Erálıev ózine senimdi kórindi. Tóreshiler de shym­kenttik jigittiń 29:28 esebi­men jeńiske jetkenin aıǵaq­tap berdi. Sonymen, jartylaı fınalda jıyrma boksshy iriktelip, aqtyq aıqasqa bettedi. Týrnırdi asa jeńil salmaqtaǵy Temirtas Júsipov pen Jomart Erjan bas­tady. Shaıqas tartysty ótke­nine qaramastan, bulardyń birin­shisi 3:0 esebimen utty. 52 kı­loda Azamat Isaqulov top jarsa, Ońtústikten kelgen Qaı­rat Erálıev (56 kg) fınalda qar­sylasyn qınalmaı jeńdi. О́ske­mendik Ádilet Qurmetov te (60 kg) osymen ekinshi márte el chempıony atandy. Sondaı-aq, altynnan alqa taqqan Bekdáýlet Ibragımov (64 kg) pen jas peri Abylaıhan Júsipovtiń (69 kg) sheberlikterin erekshe atap ótýge bolady. 75 kıloda synǵa túsken Ábilhan Aman­qul joıqyn soq­qy­laryn qarsylastaryna dóp tı­gizip júrip, bıik tuǵyrdan kórindi. Rıo Olımpıadasynda joly bol­mady demeseńiz, qalǵan týr­nırlerdiń barlyǵyn jeńgen Jánibek Álimhanuly jańa sal­maq – 81 kılony jatsynbady. Pavlodar tórinde ol aldymen ¼ fınalda ózimen attas Jánibek Qartbaevty merziminen buryn jarystan shyǵardy. Al jartylaı fınalda jastar arasynda álem birinshiliginiń kúmis júldegeri Vadım Kazakovty tórt (!) ret nok­daýnǵa jiberdi. Álim­hanulynyń jarqyn ári ashyq urysyn syrttaı baqylaǵan onyń kelesi qarsylasy Nurdáýlet Jarmanov fınalda túk bitire almady. Tipti, Jarmanovqa sońǵy raýndta eki ret esep ashyldy. Osylaısha, Almaty oblysynyń óreni bul salmaqtyń ıesi kim ekenin kórsetti. Jartylaı fınaldyń aldynda Almaty oblysynyń aǵa jat­tyqtyrýshysy Tursynǵalı Edilovtiń tamyryn basyp kór­genbiz. Bapker bul týrnırde Álim­han­ulyna teń keler eshkim joq ekenin, onyń sol qolmen urǵan soq­qysyna ekiniń biri shydas bere almaıtynyn aıtqan-dy. Aıtqany aıdaı keldi. 91 kılo salmaqta judyryq­tasqan Anton Pınchýk te eshkimge esesin jibermedi. Qostanaılyq boksshy qolynyń uzyndyǵyn tıimdi paıdalanyp otyrdy. Fı­naldaǵy qarsylasy Serik Mu­sadilovke qurmet kórsetýge bolady. Sport sheberligine kandıdat bola tura, ol sońǵy raýndta Pın­chýkke birshama soqqy daryta aldy... Asa aýyr salmaqta Oljas Boqaev­tyń baǵy jandy. Pavlodarlyq boks­shy jartylaı fınalda ońtús­tikqazaqstandyq sheber Nurjan Bekzatovtyń jolyn ke­s­kennen keıin, jergilikti jan­kúıerler oǵan úlken úmit arta bastady. Oljas jerlesteriniń senimin aqtady. Ol aqtyq synda ózinen áldeqaıda uzyn, deneli Qamshybek Qońqabaevpen teńdeı urysyp, bas júldeni ólispeı berispeıtinin ańǵartty. Nátı­je­sinde, úsh tóreshiniń ekeýi upaı ba­symdyǵyn Boqaevqa ber­di. Birinshilikke Qazaqstannyń barlyq aımaqtarynan myqty degen 186 boksshy qatysty. Mun­­da tek Danııar Eleýsinov, Ádil­bek Nııazymbetov, Vasılıı Levıt jáne Ivan Dychko tárizdi Olım­pıa­da júldegerlerine de­malys be­rilipti. Sondaı-aq, qura­ma­nyń burynǵy músheleri Birjan Ja­qyp, Oljas Sáttibaev jáne Be­rik Ábdirahmanov bul synnan kórinbedi. Almaty, Jambyl, Ońtústik Qazaqstan, Qaraǵandy oblys­tary men Astana qalasy týrnırge 15 boksshydan qosty. Eń az bylǵary qolǵap sheberi Qy­zyl­orda, Qostanaı, Soltústik Qazaq­stan jáne Batys Qazaqstan oblys­tarynan kelgen. Olardyń ár­qaısysynan – 9 boksshy. Qalǵan aımaqtan 10-12 bylǵary qolǵap she­berleri óner kórsetti. Bas bapker Myrzaǵalı Aıtja­novtyń aıtýynsha, júldege ilik­kender aldaǵy ýaqytta túr­li deń­geıdegi jarystarǵa qatysady. О́z myq­­tylyǵyn dál­el­degender ke­ler jyly Azııa jáne álem birin­shi­­liginde ury­sýǵa múmkindik alady. Almas MANAP, «Egemen Qazaqstan» PAVLODAR Sýretti túsirgen Danııar MAILYBAEV

Chempıondar tizimi

49 kılo. Temirtas Júsipov – Aqmola oblysy. 1988 jyly týǵan. Bokspen shuǵyldanǵanyna – 8 jyl. Qazaqstannyń 3 dúrkin (2013, 2014, 2016 j.j.)  chempıo­ny, Azııa chempıony (2013 j.). 52 kılo. Azamat Isaqulov – Mań­ǵystaý oblysy. 1991 jyly týǵan. Boksty 11 jyldan beri serik etedi. Qazaqstan chempıony (2011, 2016 j.j.). Qazaqstan Sparta­kıadasynyń fınalısi (2015 j.). 56 kılo. Qaırat Erálıev – Ońtústik Qazaqstan oblysy. 1990 jy­ly týǵan. Bokspen shuǵyl­dan­ǵanyna – 10 jyl. Álem birin­shiliginiń qola júldegeri (2013 j.), Rıo Olımpıadasyna qaty­sýshy. 60 kılo. Ádilet Qurmetov – Shyǵys Qazaqstan oblysy. 1994 jyly týǵan. 11 jyldan beri bokspen aınalysyp keledi. Qazaqstan chempıony (2013, 2016 j.j.). 64 kılo. Bekdáýlet Ibragımov – Oń­tústik Qazaqstan oblysy. 1995 jyly týǵan. Bokspen shuǵyl­danǵanyna – 5 jyl. Qazaqstan Spar­takıadasynyń júldegeri (2015 j.). Sport sheberi. 69 kılo. Abylaıhan Júsipov – Qaraǵandy oblysy. 1997 jyly týǵan. Jasóspirimder arasynda álem chempıony.  Boksty 12 jyldan beri serik etedi. Rıo-de-Janeı­roda ótken HHHI jazǵy Olım­pıadasyna qatysýshy. 75 kılo. Ábilhan Amanqul – Jambyl oblysy. 1997 jyly týǵan. 8 jyldan beri bokspen shuǵyldanyp keledi. «Astana-Arlandary» kásibı boks klýbynyń múshesi. Jastar arasynda Azııa chempıony. 81 kılo. Jánibek Álimhanuly – Almaty oblysy. 1993 jyly týǵan. Azııa (2013 j.) jáne álem chem­pıony (2013 j.). Azııa oıyn­darynyń chempıony (2014 j.). Rıo Olımpıadasyna qatysýshy. 91 kılo. Anton Pınchýk – Qos­tanaı oblysy. 1988 jyly týǵan. Qazaqstannyń úsh dúrkin chem­pıo­ny (2012, 2013, 2016 j.), Azııa (2013 j.) já­ne Azııa oıyn­darynyń chempıony (2014 j.). +91 kılo. Oljas Býkaev – Pav­lodar oblysy. 1992 jyly týǵan. Qazaqstan Spartakıadasynyń fına­lısi (2015 j.). Birneshe halyq­aralyq týrnırdiń jeńimpazy.

Mamandar pikiri

Ermahan YBYRAIYMOV, Sıdneı Olımpıadasynyń chempıony: – Týrnır joǵary deńgeıde uıymdastyryldy. Barlyq salmaqta básekelestik bar dep aıtýǵa bolady. Tek 60, 64 kıloda synǵa túsken balalarǵa áli de bolsa shyńdalý kerek. Jánibek Álimhanuly men Abylaıhan Júsipovtiń rıngtegi ónerleri jaqsy áser qaldyrdy. Marat MÁZIMBAEV, kásipqoı bokstan IBA chempıony: – Halyqaralyq arenada 56, 69, 81 jáne 91 kılo salmaqta nátıje bolatynyna senimdimin. 69 kıloǵa aýysqan Abylaıhan Júsipov bul týrnırde jaqsy aıqasty. Biraq azdap qatelikteri de bar. Eger de bapkerler onymen durys jumys jasap, kemshilikterin túzeıtin bolsa, onda bul bala Serik Sápıev aǵasy sekildi úlken jetistikke jetedi. Serik SÁPIEV, «Astana-Arlandary» kásibı boks klýbynyń dırektory: – Árbir jekpe-jekti tapjylmaı qarap otyrdym. Jigitterdiń qarymy jaqsy. Júldegerlerdiń arasynan «Astana Arlandary» sapyna jaraıtyndar jeter­lik. Aldaǵy ýaqytta qurama jattyqtyrýshylarymen aqyldasyp, birneshe boksshyny qatarymyzǵa qosatyn bolamyz. Jalpy, týrnır jańa talanttardy tabý jónindegi maqsatyn jaqsy oryndady.