Sırek sýretterdegi sáýleli sátter

Astanada ulttyq mereke – Qazaqstannyń Tuńǵysh Prezıdenti kúnine oraı Sputnik Qazaqstan aqparattyq agenttigi jáne radıosy Qazaqstan Respýblıkasy Ulttyq murajaıynyń qoldaýymen «Eldi ózgertken tulǵa. Nursultan Nazarbaev Sputnik obektıvinde» atty fotokórmesin uıymdastyrdy. Kórmege Sputnik tilshile­riniń 1990 jáne 2016 jyldar aralyǵynda túsirgen Qazaq­stannyń Tuńǵysh Prezıdenti Nursultan Nazarbaevtyń ómirinen alynǵan sátter beınelengen 30-ǵa jýyq muraǵattyq sırek sýretter qoı­ylypty. Sputnik obektıvinen  elimizdiń Tuńǵysh Prezıdenti Nursultan Nazarbaevty resmı jáne resmı emes ortada, áriptesteri men otbasy músheleriniń arasynda kóre alasyzdar. Sondaı-aq, kórmege kelýshiler Qazaqstan Pre­zıdentiniń Reseı Memlekettik Dý­masynda sóz sóılegen sátterin, Mıhaıl Gorbachevpen, Borıs Elsınmen, Vladımır Pýtın­men, Dmıtrıı Medvedevpen kezdesýleriniń beıresmı kadrlaryn kóre alady. 1994 jylǵy qarashada orbıtalyq «Mır» stansııasynda ǵaryshtyq saparyn aıaqtaǵan Talǵat Musabaevty Jerde qarsy alýdyń tarıhı mezetterimen qatar halyqaralyq uıymdar sammıtterinde Nursultan Nazarbaevtyń álemdik kóshbasshylar ortasynda túsken sırek sýretteri de osynda ornalastyrylypty. Kórme sýretteri tarıh betterinen syr shertýimen  jáne olardyń kópshiligi buryn jarııalanbaǵan sırektigimen qundy bolyp otyr. Sputnik Qazaqstan elimizde 2016 jylǵy qyrkúıekten bastap qyzmet etip keledi. Agenttik aktıvine qa­zaq jáne orys tilderindegi aq­parattyq portal, ǵalamtorlyq radıo jáne joǵary tehnologııa­ly mýltımedııalyq baspasóz ortalyǵy kiredi. Sputnik Qazaqstan ondaǵan elderge taralǵan halyq­aralyq aqparattyq agenttik pen radıonyń quramdas bóligi bolyp tabylady. Sputnik quramyna otyzdan astam tildegi saıttar, balamaly jáne sandyq radıohabar, uıaly telefondarǵa arnalǵan qosymshalar men áleýmettik jelilerdegi paraqshalar enedi. Sputnik jańalyqtar taspasy oqyr­mandar úshin aǵylshyn, arab, ıspan jáne qytaı tilderinde táýlik boıy shyǵarylady. Berik SADYR, «Egemen Qazaqstan» Sýretti túsirgen Erlan OMAROV,