Sýretti túsirgen – Salı SABIROV
Bıylǵy dodaǵa álemniń 94 elinen 2917 sportshy qatysty. Elimizdiń ulttyq quramasy sapynda 36 sportshy (18 er, 18 áıel) mánerlep syrǵanaý, konkımen júgirý, short-trek, frıstaıl-akrobatıka, frıstaıl-mogýl, shańǵymen tuǵyrdan sekirý, taý shańǵysy, shańǵy jarysy, bıatlon men shańǵy qossaıysy syndy sport túrlerinen baq synady. Otandastarymyz 49 medal jıyntyǵy sarapqa salynǵan básekelerde jarys jolyna shyǵyp, joǵary nátıje kórsetýge tyrysty. Bıylǵy Olımpıadada quramanyń geografııasy keńeıip, keıingi tórt olımpıadalyq sıkl ishindegi eń joǵary kórsetkishke jetti. Komanda quramyna alynǵan sportshylar sapynda elimizdiń 11 óńiriniń ókili boldy. Atap aıtqanda, Almaty, Astana, Shymkent qalalary, sondaı-aq Aqmola, Shyǵys Qazaqstan, Almaty, Pavlodar, Qostanaı, Soltústik Qazaqstan, Qaraǵandy, Abaı oblystarynyń sportshylary dodaǵa qosyldy. Buǵan deıingi qysqy Olımpıada saıystarynda 10 óńirdiń ǵana sportshysy aq alamanda baq synaý múmkindigin ıelengen edi.
Italııa tórinde ánuranymyzdy shyrqatyp, kók týymyzdy jelbiretken mánerlep syrǵanaýshy Mıhaıl Shaıdorovtyń altyn medali – orasan olja. Azat eldiń derbes delegasııasy retinde qysqy Olımpıadaǵa 1994 jyldan beri qatysyp kele jatqan sportshylarymyz mánerlep syrǵanaýdan aq alamannyń altynyn oljalaı alǵan emes. Buǵan deıin 2014 jyly Sochıde (Reseı) ótken Olımpıadada mánerlep syrǵanaýshy Denıs Ten qola medal enshilegen edi. Odan keıin mánerlep syrǵanaýshylar júldege jaqyndaı alǵan emes. Tipti 2022 jyly Qytaıda ótken Olımpııa oıyndaryna bul saıys túrinen qatyspady da.
1994 jyly Lıllehammer (Norvegııa) Olımpıadasynda Vladımır Smırnov shańǵy saıysynda top jaryp, altyn medal enshilegennen keıin Olımp shyńy asý bermesteı kórinip edi. 32 jyldan keıin elimizdiń abyroıyn asqaqtatqan Mıhaıl Shaıdorovtyń erligi maqtaýǵa da, maqtanýǵa da turarlyq. Jalǵyz altyn medaldyń arqasynda ulttyq qurama jalpy esepte 19-satyǵa turaqtady.
Olımpıadada ózge sportshylarymyz júldege ilikpegenimen, birqatary jaqsy kórsetkishterimen qýantty. Máselen, jaqynda ǵana 19 jasqa tolǵan, qysqy Olımpııa oıyndaryna tuńǵysh ret qatysyp otyrǵan mánerlep syrǵanaýshy Sofıa Samodelkına 10-orynǵa turaqtady. Bul kórsetkish el sportynyń tarıhyna áıelder arasynda mánerlep syrǵanaýdan Olımpıadadaǵy eń joǵary nátıje bolyp qattaldy. Konkımen júgirýden Nadejda Morozova 3000 metr qashyqtyqta 6-oryn, 5000 metrde 10-oryn alsa, Elızaveta Golýbeva 1500 metr qashyqtyqqa júıtkýde 7-oryn alyp, 3000 metrde úzdik ondyqqa endi. Sonymen qatar áıelder quramasy komandalyq jarysta úzdik segizdikke ilindi. 1998 jylǵy Nagano (Japonııa) Olımpıadasyndaǵy Lıýdmıla Prokashevanyń qola medalinen keıin konkıshilerimiz ondyqqa ene alǵan emes.
Shańǵymen tuǵyrdan sekirýden 19 jastaǵy Ilıa Mızernyh úlken tramplınde 8-oryn alyp, osy sport túrinen el sportyndaǵy eń úzdik nátıjeni tirkedi. Short-trekten Denıs Nıkısha 500 metr qashyqtyqta 7-oryn ıelendi. Frıstaıl-mogýldan Anastasııa Gorodko 8-oryn, Pavel Kolmakov 9-oryn alyp, 2022 jylǵy oıyndardaǵy kórsetkishterin edáýir jaqsartty. Sondaı-aq konkımen júgirý saıysynda Evgenıı Koshkın 500 metr qashyqtyqta 9-oryn, frıstaıl-akrobatıkadan (mıkst) Asylhan Asan, Roman Ivanov, Aıana Joldas úshtigi komandalyq básekede 7-oryn aldy.
Sportshylarymyzdyń XXV qysqy Olımpıadadaǵy óneri oń baǵalanyp, halyqaralyq arenadaǵy básekege qabiletti talantty sportshylardyń jańa býyny qalyptasyp kele jatqanyn kórsetti.
Kelesi, 2030 jylǵy qysqy Olımpıada Fransııa elinde ótedi.
