100 kelige deıingi salmaqta beldesken balýanymyz Maksım Rakov el namysyn abyroımen qorǵady. Ol fınalǵa deıin qarsylas shydatpaı, fınalda koreıalyq Kım Hýensheoldy vazarı upaıymen utyp, eki dúrkin Azııa chempıony atandy. Buǵan deıin, Maksım Rakov 2009 jyly Taıvanda ótken Azııa chempıonatynda jeńimpaz atanǵan bolatyn, dep habarlaıdy dzıýdo federasııasynyń baspasóz qyzmeti.
Azııa birinshiliginiń alǵashqy kúnindegi qyzdar arasyndaǵy básekede Galbadrah Otgonseseg (48 kg) fınalǵa deıin jetip, Mońǵolııa quramasynyń sportshysy Mýnhbat Ýransesesgke «Golden skorde» jol berse, fınalǵa deıin jetken taǵy bir dzıýdoshymyz Eldos Jumaqanov (66 kg) sheshýshi beldesýde álem chempıony, Olımpıadanyń kúmis júldegeri koreıalyq An Baýlǵa ese jiberip, ekeýi de kúmisti qanaǵat tutty. Jarystyń ekinshi kúninde el qorjynyna taǵy bir kúmis medal qosyldy. 90 kelide tatamıge shyqqan Islam Bozbaev fınalda tájikstandyq Komronshoh Ýstopırıenmen beldesýinde eskertý qaǵazynyń (shıdo) kóptiginen jeńilip, Azııa chempıonatynyń kúmis medaline ıe boldy.
73 kelide beldesken Jansaı Smaǵulov sheshýshi jubanysh beldesýinde Iran balýany Mohammadı Barımonloý Mohammadty ıppon upaıymen jeńip, Azııa chempıonatynyń qola júldegeri atandy. Qazaqstan qyzdar quramasynan Zere Bektaqyzy (70 kg) jáne Gúljan Isanova (+78 kg) júldegerler qatarynan kórinip, Qazaqsanǵa qos qola ákeldi.
Sondaı-aq, komandalyq saıysta Qazaqstan erler jáne áıelder ulttyq quramasy chempıonatty 5-orynmen aıaqtady.
Esterińizge sala ketsek, Qurlyqtyq chempıonatqa Azııanyń 29 elinen 244 sportshy baǵyn synady. Qazaqstan ulttyq quramasynan 18 dzıýdoshy qatysyp, 7 medal ıelendi.
