Sıfrly habar taratý úshin eki jyl qajet
«2019 jyly Qazaqstanda sıfrly efırlik teleradıohabarlaryn taratý isi josparlanyp otyr. Al ony iske qosý úshin 827 radıotelevızııa stansasyn salý qajet. Ol úshin biz bul isti bir mezgilde búkil elimiz boıynsha qolǵa alýymyz kerek. Barlyq 827 stansa salynyp bitpeıinshe, taratý júzege asyrylmaıdy. Qazirgi kezde 700-den astam osyndaı stansa salynǵan. Eki jyl bederinde biz bul jumysty aıaqtaýdy josparlap otyrmyz», dedi D.Abaev.
Mınıstrdiń sózine qaraǵanda, budan bólek, 3240 dana osyndaı habar taratý qurylǵylaryn ajyratyp tastaý qajet bolady. «Bes-alty oblysta sıfrly habar taratýdy búginnen bastaýǵa da bolady. Al balamaly qurylǵylar ajyratylyp tastalǵan kezde halyqtyń belgili bir toby ataýly áleýmettik kómekti qajetsinýi yqtımal. О́ıtkeni, habar taratý qurylǵylaryn qosý belgili bir deńgeıde aqsha bolýyn talap etedi. Sondaı-aq, el azamattarynyń áleýmettik jaǵynan qanshalyqty qaýqarly ekeni de tekserilip jatyr», dedi atalǵan máselege qatysty sózinde D.Abaev.
Qýǵyn-súrgin qurbandaryna arnalǵan joba
«Bıyl Memleket basshysynyń saıası qýǵyn-súrgin jáne asharshylyq qurbandaryn eske alý týraly Jarlyqqa qol qoıǵanyna týra 20 jyl tolady. Osy jyldar ishinde atalǵan Jarlyq sheńberinde etnomádenı birlestikter men basqa da túrli alańdarda sharalar ótkizilip keledi. Jalpy, mamyr aıynda qazaqstandyqtar tarıhı eki óte qorqynyshty qasiretterdi eske túsiredi: 9 mamyrda jáne 31 mamyrda. Bul sharalardyń basty maqsaty – sol qasiretti kezeńderdi umytpaı, este saqtaý», dedi «Habar» telearnasyndaǵy «Otkrytyı dıalog» jobasynyń efırinen vedomstvo basshysy.
Bir rettik parolge kóshý usynyldy
«Otkrytyı dıalog» jobasy aıasynda memlekettik qyzmet kórsetýlerge qatysty da áńgime qozǵaldy. Munda elektrondy sıfrly qoltańbany bir rettik parolderge aýystyrý týraly ıdeıa erekshe nazar aýdarýǵa turarlyq.
«Elektrondy sıfrly qoltańbany biz shamamen osydan on jyl buryn iske qossaq, sol kezde ol ýaqyt rýhyna jaýap berdi. Qazir biz bir rettik parolge kóshýdi usynyp otyrmyz. Adam bir rettik paroldiń kómegimen kirgen soń, bir tranzaksııany oryndap, qaıta shyǵyp kete alady. Kelesi joly onyń telefonyna jańa parol keledi. Júıe jeńildeıdi», dep atap kórsetti mınıstr.
«Biz HQO-lar beretin anyqtamalar sanyn alyp, saraptaýdan ótkizdik. 23 mln anyqtamanyń shamamen 18 mln-y bar-joǵy bes anyqtamaǵa tıesili eken. Sodan soń biz bul anyqtamalardy adamdardyń qaıda aparatynyn saraptadyq. Sóıtsek, shamamen 30 paıyzy (anyqtamalar – red.) memlekettik organdarǵa aparylady eken. Qazir bizge memlekettik korporasııanyń («Azamattarǵa arnalǵan úkimet» – red.) aqparattyq júıeleri qajet, óıtkeni, adamdar anyqtamany alyp, ony qaıtadan memleketke aparyp bermeýi kerek. Ol úshin aqparattyq júıeler ózara ıntegrasııalanýy tıis», dedi mınıstr.
