Jeńis saıabaǵyndaǵy repressııa qurbandaryna arnalǵan memorıaldyq taqtaǵa gúl shoqtary qoıyldy. Sharaǵa oblystyq ardagerler keńesi, Qazaqstan halqy assambleıasynyń músheleri, óńirdegi mekeme, kásiporyn ujymdarymen birge saıası qýǵyn-súrginge ushyraǵan azamattardyń urpaqtary da qatysty.
«Bolashaqqa baǵdar berip, qoǵamnyń órkenıet kóshine ilesip, damýyna yqpal jasaıtyn kókiregi oıaý, kózi ashyq zııalylardy aramyzdan alyp ketip, atyp tastady, ıtjekkenge aıdady. Júz myńdaǵan adam elimizdiń jarqyn bolashaǵy jolynda qurban boldy. Sol jyldary kóptegen kórnekti qaıratkerler men ózge ult ókilderi eriksiz Qazaqstan jerine aýyp keldi. Keńpeıil halqymyz olardy túrine, dinine, tiline qaramaı, týysyndaı baýyryna basty. Azattyq jolynda qurban bolǵan arystardy eske saqtaı otyryp, barshańyzdy el damýyna aıanbaı úles qosýǵa shaqyramyn», dedi aımaq basshysy Nurlan Asqaruly.
Atyraý oblysynda saıası qýǵynnyń zardabyn kórgen 7 myńnan astam adam tirkelgen. Qazir munaıly óńirde jazyqsyz japa shekken on adamnyń urpaǵy turady. Memorıaldyq taqta aldyndaǵy eske alý sharasyna zulmat jyldardan qııanat kórgen úsh azamattyń balalary men nemereleri keldi.
Baqytgúl BABASh,
«Egemen Qazaqstan»
