Shara Qazaqstan men Qytaı elderi arasyndaǵy dıplomatııalyq qarym-qatynastyń ornaǵanyna 25 jyl tolýyna oraı uıymdastyryldy. Aqparat jáne kommýnıkasııalar mınıstrliginiń uıymdastyrýymen, «Qazaqparat» halyqaralyq aqparat agenttigi men Jenmın hýabao» jýrnalynyń atqarýymen ótken sharaǵa eki taraptyń jaýapty ókilderi qatysty.
Bıyl Qytaıdyń Qazaqstandaǵy týrızm jyly. Fotokórmeniń uıymdastyrylýynyń bir sebebi osy ekenin «Qazaqparat» basshysy Asqar Qumyran aıtty. Al QHR ádebı týyndylardyń shet tilderinde basylýy jáne taralýy jónindegi basqarma bastyǵynyń orynbasary Fa Jyń Hýaıbasqarmanyń byltyr «Qazaqparat» agenttigimen yntymaqtastyq týraly kelisimge qol qoıǵanyn, ótkizilip otyrǵan shara sol kelisimniń nátıjesi ekenin baıandady.
Fotokórmege eki eldiń eń kórikti jerleriniń sýretteri qoıyldy. Mysaly, Kaspıı teńizi, Baıanaýyl ulttyq memlekettik tabıǵı parki, Býrabaı kóliniń, Astananyń kórikti ǵımarattarynyń, Túrkistandaǵy Qoja Ahmet Iаsaýı atyndaǵy keseneniń fotolary elimiz tarapynan qoıylsa, Qytaı eli tarapynan Uly Qytaı qorǵanynyń, Beıjińniń ortalyǵyndaǵy kirýge tyıym salynǵan jer – Mın jáne Sın ımperııasynyń ımperator saraıynyń, Iýnnandaǵy 270 mıllıon jyl buryn qalyptasqan Kýnmın qalasynyń, Shensın ólkesindegi Bınsıan býdda hramynyń, Sııaoıan munarasynyń, Gansý ólkesindegi Ýımengýan kóne jurtynyń fotosýretteri qoıyldy. Jalpy, kórmeden eki eldiń qorǵaýǵa alynǵan ań-qustaryn, úı janýarlaryn, dostyq ráýishtegi kezdesýlerdi beıneleıtin kóptegen fotolardy ushyrattyq.
Aıgúl SEIILOVA,
«Egemen Qazaqstan»
