Foto: astrec.kz
«Elektr qýaty turaqty ári jetkilikti kólemde óndirilmese, jasandy ıntellektini engizý jáne jappaı sıfrlandyrýdy júzege asyrý múmkin bolmaıtyny anyq. Bul másele jóninde men Ulttyq quryltaı otyrysynda pikirimdi anyq aıtyp kettim.
Elimiz elektr energııasynyń ishki tapshylyǵyn joıý úshin ony jyl saıyn ımporttaýǵa májbúr. Byltyr 3,7 mıllıard kılovatt-saǵat energııany syrttan aldyq. Qýat kózderi men elektr jelileriniń ábden eskirýi de bul saladaǵy ahýaldy ýshyqtyryp tur», dedi Memleket basshysy.
Ulttyq antıfrod-ortalyǵy 90 myń azamatty alaıaqtardyń arbaýynan saqtap qaldy
Prezıdentiń aıtýynsha, ótken úsh jylda «Tarıfti ınvestısııaǵa aıyrbastaý» baǵdarlamasy aıasynda energetıka salasyna 1 trln teńgeden astam qarjy salyndy. Bul qarajattyń negizgi bóligi, ıaǵnı, 900 mlrd teńgeden astam qarjy jóndeý jumystaryna jumsaldy.
«Jańa qýat kózderin iske qosýǵa 140 mıllıard teńge ǵana bólingen. Bul uzaq ýaqyt boıy turaqty energojúıeni qamtamasyz etýge jetpeıtini anyq. Elektr qýaty jetkiliksiz bolsa, elimiz oıdaǵydaı damı almaıdy. Osy mańyzdy máseleni eskermeı jospar qurý – esh qısynǵa kelmeıtin sharýa.
Energetıka mınıstrliginiń burynǵy basshylary tek munaımen shuǵyldanǵan sııaqty, elektr qýaty óndirisi ekinshi qatarda nazardan tys qaldy. Endi bul olqylyqty tez arada túzetýimiz qajet», dedi Qasym-Jomart Toqaev.
Memleket basshysynyń sózinshe, qazirgi kezde Qazaqstanda 123 mıllıard kılovatt-saǵat elektr energııasy óndiriledi. Bul elimiz úshin jetkiliksiz.
«Úkimet 2029 jyldyń sońyna deıin 13,3 gıgavattyq jańa qýat kózderin iske qosamyz dep josparlap otyr. Onyń 5,9 gıgavaty jańartylatyn qýat kózderinen alynbaq.
Sondaı-aq Úkimet kelesi jyly elektr qýatyna degen suranysty tolyq óteýdi kózdep otyr. Tipti, 1,3 mıllıard kılovatt-saǵat qýatty artyq óndire alamyz degen boljam bar. Biraq bul maqsatqa jetý úshin mindettemeniń bári ýaqtyly oryndalyp, jetkilikti qarajat bólinýge tıis», dedi Prezıdent.
Prezıdent: Aımaqtar ekonomıkasynda sheshimin tappaǵan máseleler áli de bar
Qasym-Jomart Toqaevtyń aıtýynsha, bizde qýat kózderin iske qosý merzimin qaıta-qaıta keıinge qaldyrý ádetke aınaldy. Mysaly, Almatydaǵy 2-shi jáne 3-shi jylý elektr ortalyǵyn jańǵyrtý merzimi birneshe ret shegerildi. Jumys áli kúnge deıin júrgizilip jatyr.
«Sondyqtan Úkimet josparlanǵan qýat kózderiniń tolyq iske qosylýyn qamtamasyz etýge tıis. Budan bylaı soza berýge bolmaıdy.
Meniń oıymsha, másele – naǵyz energetıka mamandarynyń bolmaýynda. Energetıka salasyndaǵy máselelermen «alyp bara jatqan ne bar deısiń?» dep, «azdy-kem bilimi bar, biraq ózine degen senimi mol» kez kelgen adam aınalysatyn boldy», dedi Prezıdent.
