Taraptar 2017-2018 j.j. kezeńinde Qazaqstannan Qytaıǵa tabıǵı gaz jetkizýdiń múmkindigin talqylap, 5 mıllıard tekshemetrge deıingi kólemde qazaqstandyq gazdy eksportqa satý shartyna qol qoıýǵa kelisti. Munaı-gaz kompanııalarynyń basshylary ózara túsinistik týraly memorandýmǵa qol qoıdy. Qujat ónimdi jetkizý kólemderin, baǵasyn jáne sapasyn, sondaı-aq qytaı tarapynyń gazdy qabyldap alý orny – «Qorǵas» shekara pýnkti dep aıqyndaldy.
«QazMunaıGaz» UK AQ Basqarmasynyń Tóraǵasy Saýat Myńbaev Astanada qol qoıylǵan memorandým, Qazaqstan men Qytaıdyń ekijaqty ózara tıimdi yntymaqtastyǵyn odan ári nyǵaıtýǵa myqty negiz dep atap ótti.
«QazTransGaz» AQ dırektorlar Keńesiniń tóraǵasy Qaırat Sháripbaevtyń pikirinshe, qazaqstandyq gazdy tasymaldaýdyń tranzıttik jáne eksporttyq baǵyttaryn ártaraptandyrý, sondaı-aq kógildir otyn eksportynyń kólemin ulǵaıtý - memleket basshysy belgilegen strategııalyq mindet. Qytaıǵa qazaqstandyq gazdy eksporttaý týraly ýaǵdalastyqqa qol jetkizýge eksportqa baǵyttalǵan tasymal júıesin qalyptastyrý jónindegi óte aýqymdy jáne kúrdeli jumystar arqyly qol jetti: «Beıneý-Bozoı-Shymkent» gaz qubyry salyndy, «Qazaqstan-Qytaı» magıstraldyq gaz qubyrynyń úshinshi tarmaǵyn paıdalanýǵa engizý jáne joǵary tehnologııalyq «Bozoı», «Qaraózek» kompressorlyq stansııalary men «Aqyrtóbe» syǵymdaý kompressorlyq stansııasynyń salynýy.
Kezdesýde atalyp ótilgendeı, qazaqstandyq gazdy Qytaıǵa jetkizý ekijaqty ózara tıimdi qarym-qatynastarǵa, sondaı-aq Eýrazııa elderi arasynda ınfraqurylym qurýǵa jáne saýda, kóliktik baılanystardy jolǵa qoıýǵa baǵyttalǵan «bir beldeý, bir jol» bastamasy sheńberinde yntymaqtastyq qarym-qatynastaryn birlesip qamtamasyz etýge jáne ilgeriletýge yqpal etetin bolady.
