Mamandardyń sózine sensek, kenishti sý basýyna qysta jaýǵan qalyń qardyń erýi men Fıllıpovka ózeniniń aǵyndy sýynyń qosylýy áser etken. «Qazsınk» kompanııasy ken baıytý óndirisiniń atqarýshy dırektory Valerıı Zavıalov qazirgi ýaqytta kenishtegi jaǵdaıdyń turaqtalyp qalǵanyn, sýdy sorý jumystary táýlik boıy júrgizilip jatqanyn aıtady. «Oqıǵa oryn alǵan kúnnen bastap jedel túrde arnaıy shtab qurylyp, karer ishin sýdan tazalaý, kenish mańynda turatyn turǵyndardyń qaýipsizdigin qamtamasyz etý sharalary shuǵyl qolǵa alyndy. Karer túbindegi sýlar sý aıdaý qondyrǵylary arqyly syrtqa sorylyp shyǵarylyp, kombınattyń qaldyq saqtaý ornyna qaraı aǵyzylyp jatyr. Shuǵyl is-sharalardyń nátıjesinde kenishti sý basýdan saqtap qaldyq. Birneshe kúnnen beri kenishtiń ishindegi jaǵdaı turaqtandy. Kenishti sýdan tazartyp, sý basýdan saqtaý úshin elimizdiń ǵana emes, Reseıdiń bilikti degen mamandarynyń kómegine júginip jatyrmyz», - deıdi ol.
Al kenish mańyndaǵy turǵyndarǵa kelsek, tótenshe oqıǵa tirkelgen 7 mamyrdan bastap olar kásiporynnyń Rıdder qalasyndaǵy profılaktorııine kóshirilip, jatar oryn, isher aspen qamtamasyz etilipti. Dúnıe-múlikteri qaraýǵa alynyp, kúzet qoıylypty. «Qazsınk» JShS ákimshilik máseleler jónindegi atqarýshy dırektory Andreı Lazarevtiń aıtýynsha, qazirgi ýaqytta karer mańynda ornalasqan jeti úıdiń turǵyndarynyń barlyǵy da baspanamen qamtamasyz etilgen. Kásiporyn bul maqsatqa 50 mıllıon teńge kóleminde qarjy qarastyrypty.
«Kenishti sý alǵanyn biz áýelde ańǵarǵan joqpyz. Biraq qoradaǵy qaz-taýyqtarymyzdyń typyrshyp, mazasyzdanǵanyn kórdik. Sý basqan kúnniń erteńinde bizdi qaýipsiz jerge kóshirdi. Buryn eki bólmeli úıimiz bolsa, qazir mine, tórt bólmeli baspanaǵa qol jetkizdik», - deıdi Rıdderden jańa baspana alǵan zeınetker Vera Feklıstova.
Azamat QASYM,
«Egemen Qazaqstan»
Shyǵys Qazaqstan oblysy, Rıdder qalasy
