Búginge deıin qol jetken nátıje de joq emes. Stýdentter respýblıkalyq, aımaqtyq sán baıqaýlarynda «júzden – júırik, myńnan – tulpar» shyǵyp, júldeli oryndarǵa ıe bolyp júr. Instıtýt ustazdary sándik-qoldanbaly óner buıymdaryn jasaýdy jete tanystyrý arqyly bolashaq mamandardyń kásibı sheberligin arttyrýdy kózdep otyr.
– Ortalyqta jastar kilem toqý, syrmaq syrý, kıim tigý sııaqty ata-babamyzdan mura bolyp kele jatqan bekzat ónerge mashyqtanady. Sonymen qatar, munda aǵash buıymdary men sándi shymyldyqtar, baý, basqur, sandyqqap, tegerish syndy kıiz úı jabdyqtary daıyndalady. Stýdentterge halqymyzdyń ǵasyrlar boıy jınaqtalǵan estetıkalyq, mádenı muralaryn tereń meńgertý arqyly olardyń tanymdyq kózqarasyn qalyptastyryp, qolónerge qyzyǵýshylyqtaryn oıatýdy kózdeımiz. Sondaı-aq, ulttyq kıim úlgilerindegi elementterdi jańa úlgidegi ulttyq kıimderge endirip, tyń brendtter qalyptastyrmaq nıettemiz, – dedi Kásiptik oqytý jáne dızaın kafedrasynyń meńgerýshisi Aınur Jaskılenova.
Aıbıke Hamıt Taraz memlekettik pedagogıkalyq ınstıtýtynda «Kásiptik oqytý» mamandyǵy boıynsha oqıdy. Boıjetken sabaqtan tys ýaqytta ortalyqta dızaındyq kıim úlgileri men kolleksııalardy modeldep, qurastyrýdy ádetke aınaldyrǵan.
– Búginde eńbek naryǵynda dızaıner mamandaryna degen qajettilik baıqalady. Buǵan sebep te joq emes. Ulttyń ulylyǵyn ulyqtaıtyn buıymdarǵa degen suranys kún ótken saıyn artyp keledi. Elimiz boıynsha sán ortalyqtary men sheberhanalar da kóptep ashylýda. Maqsatym – ata-baba dástúrin keńinen nasıhattaý arqyly zamandastarymdy tól ónerdi baǵalaýǵa, ulttyq murany saqtaýǵa úndeý, – deıdi A. Hamıt.
Ortalyqta aıyna 10-nan astam kıim úlgisi tigiledi. Jas sheberler olardyń árqaısysynyń bir-birine uqsamaýyna erekshe nazar aýdarady. «Kóktem gúli», «Kerbez sulý», «Tomırıs», «Hanshaıym» sııaqty kózdiń jaýyn alatyn sándi kıim kolleksııalaryn kópshilikke tanystyrý maqsatynda jyl saıyn shyǵarmashylyq jumystardyń kórmesin uıymdastyrý dástúrge aınalǵan.
– Memleket basshysy Nursultan Nazarbaev «Bolashaqqa baǵdar: rýhanı jańǵyrý» atty baǵdarlamalyq maqalasynda babadan balaǵa mıras bolyp kele jatqan mádenı muralarymyzdy óskeleń urpaqqa jetkizýdi hám tanystyrýdy mindettegen bolatyn. Táýelsizdik jyldarynda tól jádigerlerimiz bolyp sanalatyn ulttyq kıimderimiz ben qolónerimizdi dáripteýge aıryqsha kóńil bóline bastady. «El ishi – óner kenishi» demekshi, aımaqtarda osy salany damytýǵa úles qosyp, ónerlerimen tanylǵan sheberlerdiń qarasy artty. Osy oraıda pedagogıkalyq ınstıtýtta umyt bolyp bara jatqan dúnıelerimizben qaıta qaýyshtyrý ári jergilikti ismerlerdiń ózara tájirıbe almasýyna uıytqy bolý maqsatynda kórmeler, óner festıvaldary turaqty túrde ótkiziledi, – dep atap ótti oqý ornynyń Aqparattyq-ımıdjdik qyzmetiniń jetekshisi Jandar Asan.
