Álem ártisteriniń ishinen fınalǵa Qazaqstan men Ulybrıtanııa ónerpazdary súrinbeı jetti. Jartylaı fınalda otandastarymyz serbııalyq áriptesterin 3:1 esebimen utsa, ekinshi jartylaı fınalda Ulybrıtanııa quramasy alań qojaıyndary Reseı quramasyn 1:0 esebimen jeńdi. Al, fınaldyq machta qazaq ártisteri Ulybrıtanııadan kelgen áriptesterin 2:1 esebimen jeńip, tarıhta tuńǵysh ret álem chempıony atandy.
Buǵan deıin qazaq ártisteri álem chempıonatyna tórt ret qatysty. 2015 jyly besinshi orynmen shektelgen bolatyn. Sol jyly toptyq básekede ártis fýtbolshylarymyz Argentına (3:0), Túrkııa (3:1) jáne Rýmynııa (4:2) quramalaryn jeńip, óz tobynda birinshi oryn ıelengen edi.
Ártister arasyndaǵy álem chempıonatynyń erejesi boıynsha quramaǵa sporttyq karerasyn aıaqtaǵan úsh kásibı fýtbolshyny qosýǵa bolady. Qazaqstan ártister quramasy komandaǵa eki kásipqoı fýtbolshyny qosqan. Olar «Qaırat», «Atyraý» jáne Semeıdiń «Elim-aı» jáne «Spartak» klýbtarynyń eks-qorǵaýshysy Sergeı Kýsov pen «Qyzyljar», «Oqjetpes» jáne «Suńqar» klýbtarynda dop tepken jartylaı qorǵaýshy Aleksandr Chepýkavıchýs.
Ártister arasyndaǵy álem chempıonaty atanǵan Qazaqstannyń «juldyzdy» komandasy mynadaı quramda óner kórsetti:
Ábdikárim Kárimov (ánshi, X-factor jeńimpazy), Aqylbek Dosjanov (rejısser), Mels Caǵat (ánshi), Ánýar Matjanov (rejısser), Erlan Álimov (ánshi), Arman Qońyrbaev, Ádilbek Sarbaev (ekeýi de «Mısterıons»), Abaı Jansarbaev (Qurmanǵazy orkestriniń mýzykanty), Ańsat Dildabaı («Juniors» toby), Marselen Kamate (akter, júrgizýshi), Qýanysh Kerimqulov (teatr jáne kıno akteri), Ǵadylbek Janaı (ánshi), Nurjan Kermenbaev (ánshi), Táýekel Músilim (akter), Aman Meńdibaı, Asyl Parın, Ǵalym Raıhan jáne Almas Altynbek, (bári «Ańsar» kvarteti), Ádil Ahmetov (teatr jáne kıno akteri), Ǵalymjan Arystanbek («Akzhol Serik Dj Bars» komandasynyń prezıdenti), Rýslan Seıitov (bıznesmen, komanda demeýshisi), Rysbek Atashev («Arai» toby), Ravıl Isakov, Álisher Egemberdıev (ekeýi de «The Jigits» toby), Muqasan Shahzadaev (Halyq ártisi), Ádiljan Omarov («Rıngo» toby), Kúntýǵan Soltan («Seriler» toby) jáne Ersultan Jasybaı (birinshi sanattaǵy tóreshi).
«Alataý» klýbynyń bas bapker Marat Ismuratov bolsa, komandany alańǵa bastap shyqqan kapıtan – Muqasan Shahzadaev.
Álı BITО́RE,
«Egemen Qazaqstan»
