Kórshi elmen qatynasty retteıtin qujattar maquldandy

Aldymen «Qazaqstan Res­pýb­lıkasy men Qyrǵyz Res­pýb­lıkasy arasyndaǵy Tarıftik saıasat negizderin qosa alǵanda, temir jol kóligi kórsetetin qyzmetterge qol jetkizýdi retteý tártibin qoldaný týraly kelisimdi ratıfıkasııalaý týraly» zań jobasy maquldandy. Atalǵan taqyryp aıasynda arnaıy baıandama jasaǵan Investısııalar jáne damý mınıstri Jeńis Qa­sym­bek osy kezge deıin qol qoıyl­ǵan kelisim 2017 jyldyń 10 qań­tarynan bastap ýaqytsha qol­danylatyndyǵyn jáne eki memleket arasyndaǵy Eýrazııalyq eko­nomıkalyq odaq týraly shart mynadaı qaǵıdalardy qaras­tyratynyn atap ótti. 

«Birinshiden, taraptardyń qazaqstandyq jáne qyrǵyz­stan­dyq tutynýshylar úshin temirjol kóligi men ınfraqurylym qyz­metteri jáne basqa da ınfra­qu­rylym nysandaryna, temir jol tasymaldaýshylaryna teń quqyly qoljetimdiligi qam­tylady. Bizdiń elimizde mundaı talaptar 2014 jyly Eýrazııalyq ekonomıkalyq odaq týraly shart kúshine engen kúnnen bastap qoıyla bastaǵan bolatyn. Al qyrǵyz tarapy 2016 jyly tıisti ózgeristerdi engizdi. Ekinshiden, Qazaqstan men Qyrǵyz ara­syn­daǵy jáne taraptarmen EAEO týraly Sharttyń aıasynda tran­zıttik tasymaldanatyn júkterdi biryńǵaı tarıftermen qoldaný tártibi eskerilgen», dedi J. Qa­symbek. 

Onyń túsindirýinshe, biryń­ǵaı tarıfterdi qoldaný tasymal­daý kóleminiń ulǵaıýyn qamta­masyz etedi jáne búginde eki el arasyndaǵy tasymaldaý kólemi ótken jylǵy sáıkes kezeńmen salystyrǵanda 14 paıyzǵa ósken.

Investısııalar jáne damý mınıstrinen keıin sóz alǵan Qarjy mınıstri Baqyt Sultanov Qazaqstan men Qyrǵyzstannyń qarym-qatynasyna qatysty tórt birdeı zań jobasyn tanystyrdy. Onyń alǵashqysy «Qazaqstan Respýblıkasynyń Úkimeti men Qyrǵyz Respýblıkasynyń Úki­meti arasyndaǵy Kómek kórsetý jáne ony paıdalanýdy baqylaý tártibi týraly hattamany ratıfıkasııalaý týraly» qujat boldy.

Bul zań jobasy Eýrazııalyq ekonomıkalyq odaqqa Qyrǵyz Respýblıkasynyń qosylýyna oraı, Odaqtyń kedendik shekarasy syrtqy kontýrǵa, ıaǵnı qyr­ǵyz-qytaı, qyrǵyz-tájik, qyr­ǵyz-ózbek shekarasyna aýysýy­na baılanysty týyndap otyr. Sebebi, osy rette qyrǵyz sheka­rasynyń ınfraqurylymy sapaly jaraqtandyrý men jań­ǵyrtýdy qajet etedi.

Sondyqtan da Odaqtyń syrtqy shekarasyn baqylaý maqsatynda memleketter basshylary deńgeıinde Qyrǵyzstanǵa kómek kórsetý týraly sheshim qabyldanyp, bul kómek bul eldiń Odaqqa qosylýy jónindegi «jol kartalarynda» kózdelgen is-sharalardy iske asyrýǵa baǵyttalmaq.
«Sizderdiń qaraýlaryńyzǵa «Qazaqstan Respýblıkasynyń Úkimeti men Qyrǵyz Respýb­lı­kasynyń Úkimeti arasyndaǵy Kómek kórsetý jáne ony paıdalanýdy baqylaý tártibi týraly hattamany ratıfıkasııalaý týraly» zań jobasy usynylyp otyr. Hattamaǵa 2016 jyly 26 jeltoqsanda Sankt-Peterbýrgte qol qoıyldy. Tártipke sáıkes eń aldymen, Kómek birneshe transh­tarmen beriledi. Ár kezde jeke Tehnıkalyq járdem kórsetý týraly hattamalarǵa qol qoıylady jáne ratıfıkasııalanady; ekinshiden, is-sharalar tizbesine Qyrǵyzstannyń Eýrazııalyq ekonomıkalyq odaqqa qosylýy boıynsha «jol kartasynyń» is-sharalary ǵana kiredi; úshin­shiden, kómek aqshalaı qarajat, jab­dyqtar, taýarlar men qyz­metter, oqytý formalary arqyly kórsetilýi múmkin; tór­tin­shiden, Qyrǵyzstan tarapy kómek­ti paıdalanǵany jónindegi usy­nylǵan qujattardyń durys­ty­ǵyna jaýapty; jáne sońǵy talap, transhtardyń júzege asyrylý qorytyndysy boıynsha ony paıdalanýdy baqylaý qam­ta­masyz etiledi», – dedi B.Sul­tanov.

Mınıstrdiń baıandaýyn­sha atalǵan qujatta kórse­til­gen Kó­mek Qazaqstan Respýblı­ka­sy­nyń ult­tyq zańnamasymen regla­ment­­telmegendikten, engi­zilgen Hat­tama ratıfıkasııalaýǵa jatady. 

Kún tártibine shyǵarylǵan kelesi qujat «2016 jylǵy 26 jel­toqsandaǵy Qazaqstan Res­pýb­lıkasynyń Úkimeti men Qyr­ǵyz Respýblıkasynyń Úkimeti arasyndaǵy Kómek kórsetý já­ne ony paıdalanýdy baqylaý tár­tibi týraly hattamaǵa ózgerister men tolyqtyrý engizý týraly Qazaqstan Respýblıkasynyń Úkimeti men Qyrǵyz Respýb­lı­kasynyń Úkimeti arasyndaǵy hattamany ratıfıkasııalaý týraly» zań jobasy boldy.
Bul hattamamen Qyrǵyz Res­pýb­lıkasyna tehnıkalyq jár­dem kórsetý is-sharalarynyń tiz­besin (shyǵystar smetasy) keli­sýin jeńildetý maqsatynda kómek kórsetý tártibine ózgeris­ter engiziledi. Al ózgerister naqty­laý sıpatyna ıe jáne ol Qa­zaq­stan tarapynan Qyrǵyzstanǵa tehnıkalyq járdem kórsetý sheńberindegi júrgiziletin jumystaryn ýaqtyly jáne sapaly iske asyrý úshin ázirlendi.

Osy kúni depýtattar «Qazaq­stan Respýblıkasynyń Úkimeti men Qyrǵyz Respýblıkasynyń Úkimeti arasyndaǵy Tehnıkalyq járdem kórsetý týraly hattamany ratıfıkasııalaý týraly» zań jobasyn da biraýyzdan maquldady. 

2016 jylǵy 26 jeltoqsanda Qazaqstan Respýblıkasynyń Úki­meti men Qyrǵyz Respýb­lı­ka­s­ynyń Úkimeti arasyn­daǵy Eýrazııalyq ekonomı­kalyq ıntegrasııa jaǵdaıynda ekonomıkalyq yntymaqtastyqty damytý týraly kelisimniń 2-babyn iske asyrý úshin tehnıkalyq járdem kórsetý is-sharalar tizbesi aıasynda transh somasy – 7 526 789 AQSh dollaryn quraıtyn Kómektiń 7 mln AQSh dollarǵa aqshalaı formada jáne 0,5 mln AQSh dollarǵa oqytý boıynsha kórsetiletin qyzmetter túrin usyný kózdeledi.

«Al beriletin járdem arqy­ly mynadaı is-sharalar qar­jylandyrylatyn bolady: 1 286 800 AQSh dollaryna kedendik ótkizý pýnktterin (Dostýk, Ka­ramyk, Madanııat) jaılastyrý; 5 662 149 AQSh dollaryna sy­naq zerthanalaryn jańǵyrtý, sondaı-aq tehnıkalyq retteý sala­synda oqytý; 577 840 AQSh dol­laryna kólik salasynda zert­hanalardy jaraqtandyrý qarjy­landyrylady. Qarjylandyrý kózi – respýblıkalyq bıýdjet negizinde iske asyrylady»,  dedi B.Sultanov.

Zań jobasy ratıfıkasııalaýǵa jatady jáne Qyrǵyz Respýb­lıkasyna járdem kórsetý máse­lesi boıynsha qujattar paketinde qaralyp otyr.
Qarjy mınıstriniń tanystyrýymen maquldanǵan kele­si qujat «2016 jylǵy 26 jel­toqsandaǵy Qazaqstan Respýb­lıkasynyń Úkimeti men Qyrǵyz Res­pýblıkasynyń Úkimeti arasyn­daǵy Tehnıkalyq járdem kórse­tý týraly hattamaǵa ózgeris­ter engizý týraly Qazaqstan Respýblıkasy Úkimeti men Qyr­ǵyz Respýblıkasy Úkimeti arasyndaǵy hattamany ratıfıkasııalaý týraly» zań jobasy boldy. Bıylǵy jyldyń 17 naýryzynda Máskeýde jasalǵan Hattamada birinshi transhtyń somasy 41 038 096 AQSh dollaryn quraıtyny jáne salalar boıynsha tehnıkalyq járdem kórsetý is-sharalar tizbesi bekitiletini kórsetilgen. Sonymen qatar, ishki ıirimindegi tıisti mindettemeler taraptardyń vedomstvoaralyq deń­geıinde bekitiletini kóz­delgen.
Aıta keteıik, atalǵan is-sharalar kedendik ákimshilendirý rásimderin jedeldetýge, baqylaý sapasyn arttyrýǵa, Eýrazııalyq ekonomıkalyq odaqtyń kedendik aýmaǵyna ákelinetin taýarlardyń qajetti qaýipsizdik deńgeıin qamtamasyz etýge baǵyttalǵan.

Nurlybek Dosybaı,
«Egemen Qazaqstan»