Reseı Federasııasynyń Prezıdenti Vladımır Pýtın Nursultan Nazarbaevty týǵan kúnimen quttyqtap, Elbasynyń memleketimizdi áleýmettik-ekonomıkalyq turǵyda damytýda jáne Qazaqstannyń álemdik arenadaǵy ornyn nyǵaıtýda zor úles qosqanyn atap ótti.
«Sizdiń elderimiz arasyndaǵy odaqtastyq pen strategııalyq seriktestik qarym-qatynasty nyǵaıtýdaǵy, sondaı-aq ózara tıimdi ıntegrasııalyq úderisterdi damytyp, eýrazııa keńistigindegi qaýipsizdikti qamtamasyz etýdegi jeke úlesińiz ushan-teńiz.
Aramyzdaǵy ózara túsinistik pen senimdi joǵary baǵalaımyn. Biz ekijaqty, óńirlik jáne halyqaralyq kún tártibindegi barlyq másele boıynsha birlesip jemisti qyzmet atqaryp kelemiz», – delingen hatta.
V.Pýtın Memleket basshysyna zor densaýlyq, baq-bereke tilep, Qazaqstan halqynyń ıgiligi jolynda jańa tabystarǵa jetýge nıettestigin bildirdi.
***
Qytaı Halyq Respýblıkasynyń Tóraǵasy Sı Szınpın óz quttyqtaýynda Qazaqstan men Qytaı qarym-qatynasynyń mańyzdylyǵy men onyń aıryqsha qarqynmen damyp kele jatqanyn aıtyp, eki el arasyndaǵy jan-jaqty strategııalyq áriptestikti odan ári nyǵaıtýǵa nıetti ekenin jetkizdi.
«Sońǵy jyldary Qytaı men Qazaqstan arasynda saıası ózara senim nyǵaıyp, «Bir beldeý, bir jol» birlesken bastamasy jemisti iske asyryla bastady, sondaı-aq naqty yntymaqtastyq aıasy keńeıip, gýmanıtarlyq baılanystarymyz da belsendi damyp keledi. Siz bıylǵy mamyr aıynda Qytaıda ótken «Bir beldeý, bir jol» atty halyqaralyq forýmǵa qatystyńyz. Bir aı buryn men Qazaqstanǵa resmı saparmen kelip, Shanhaı yntymaqtastyq uıymynyń sammıti men Astanadaǵy «EKSPO-2017» kórmesiniń saltanatty ashylý rásimine qatystym. Biz ekijaqty qarym-qatynas pen barlyq saladaǵy naqty yntymaqtastyqty nyǵaıtý jóninde pikir almasyp, mańyzdy ýaqdalastyqtarǵa qol jetkizdik», – delingen jedelhatta.
Qytaı Halyq Respýblıkasynyń Tóraǵasy Qazaqstan Prezıdentine zor densaýlyq men barlyq bastamalaryna tabys tiledi.
***
Ázerbaıjan Respýblıkasynyń Prezıdenti Ilham Álıev Nursultan Nazarbaevtyń parasatty ári kóregen basshylyǵymen Qazaqstannyń áleýmettik-ekonomıkalyq jáne mádenı salalary joǵary qarqynmen damyp kele jatqanyn atap ótip, elimizdiń jahandyq úderisterge belsendi atsalysyp otyrǵanyna nazar aýdardy.
I.Álıev Memleket basshysynyń Ázerbaıjan men Qazaqstan arasyndaǵy dostyq pen tatý kórshilik dástúrin saqtaý isindegi eńbegin joǵary baǵalady.
«Tarıhı tamyry bir halyqtarymyzdyń qalaýymen memleketterimiz arasyndaǵy qarym-qatynas, seriktestigimiz, ekijaqty jáne kópjaqty yntymaqtastyǵymyz budan ári de qarqyndy damı beretinine senimdimin.
Qurmetti Nursultan Ábishuly, osy aıtýly kúnde Sizge zor densaýlyq, baqyt jáne baýyrlas Qazaqstan halqynyń ósip-órkendeýi jolyndaǵy qyzmetińizge tabys tileımin», – delingen quttyqtaý hatta.
***
Belarýs Respýblıkasynyń Prezıdenti Aleksandr Lýkashenko táýelsiz Qazaqstannyń jetistikteri Nursultan Nazarbaevtyń qyzmetimen tikeleı baılanysty ekenin atap ótti.
«Siz elińizdiń áleýmettik-ekonomıkalyq damýyndaǵy kúrdeli mindetterdi sheshýde jáne onyń halyqaralyq bedelin nyǵaıtýda aıtarlyqtaı tabystarǵa jettińiz. Búginde Qazaqstan qazirgi álemniń syn-tegýrinderine tótep berip, ozyq bastamalar kóterip, bolashaqqa senimmen qaraıdy», – delingen jedelhatta.
A.Lýkashenko Belarýs pen Qazaqstannyń barlyq saladaǵy baılanystaryn odan ári keńeıtýge senim bildirip, Memleket basshysyna zor densaýlyq pen baq-bereke tiledi.
***
Ýkraına Prezıdenti Petr Poroshenko Nursultan Nazarbaevty týǵan kúnimen quttyqtap, onyń Qazaqstan Prezıdenti retindegi qyzmetin óz eline qaltqysyz qyzmet etýdiń úlgisi ekenin atap ótti.
«Ýkraına men Qazaqstan arasyndaǵy dostyq qarym-qatynas halyqtarymyzdyń ıgiligi úshin qol jetkizilgen ekijaqty ýaǵdalastyqtardy iske asyrýǵa septigin tıgizetinine senemin. Múmkindikti paıdalana otyryp, Sizdi Ýkraınaǵa memlekettik saparmen kelýge shaqyrýymdy rastaımyn. Sizdiń saparyńyz ózara tıimdi seriktestikti damytýǵa tyń serpin berip, eki el arasyndaǵy ózara túsinistikti nyǵaıtatyn bolady», – delingen hatta.
P.Poroshenko Qazaqstan Prezıdentine zor densaýlyq tilep, jaýapty memlekettik qyzmette sarqylmas kúsh-qaırat pen jańa tabystarǵa jetýge nıettestik bildirdi.
***
О́zbekstan Respýblıkasynyń Prezıdenti Shavkat Mırzııoev Nursultan Nazarbaevtyń basshylyǵymen Qazaqstan halqynyń ıgiligi úshin iske asyrylyp jatqan aýqymdy jobalar men baǵdarlamalardyń nátıjelerine toqtaldy.
Sonymen qatar, Sh.Mırzııoev Memleket basshysynyń Qazaqstan men búkil Ortalyq Azııanyń halyqaralyq arenadaǵy bedelin arttyrýdaǵy mańyzdy bastamalary men belsendi qyzmetin joǵary baǵalady.
«Oǵan dálel retinde ásem ári zamanaýı Astanada Halyqaralyq «EKSPO-2017» mamandandyrylǵan kórmesiniń joǵary deńgeıde uıymdastyrylýyn, jahandyq jáne óńirlik saıasat pen qaýipsizdik, ekonomıka men ınvestısııalar, mádenıet pen ǵylym salalaryndaǵy iri is-sharalardyń tabysty ótýin, sondaı-aq halyqaralyq qurylymdar aıasyndaǵy tıimdi jumystar men tabysty ózara is-qımyldy atap ótýge bolady», – delingen jedelhatta.
Shavkat Mırzııoev Nursultan Nazarbaevqa zor densaýlyq, baq-bereke jáne jaýapty memlekettik qyzmette jańa tabystarǵa jetýge tilektestik bildirdi.
***
Tájikstan Respýblıkasynyń Prezıdenti Emomalı Rahmon Nursultan Nazarbaevtyń Qazaqstandy ornyqty damytýǵa ári órkendetýge jáne onyń álemdik qoǵamdastyq arasyndaǵy bedelin nyǵaıtýǵa zor úles qosqanyn atap ótti.
«Múmkindikti paıdalana otyryp, Tájikstan men Qazaqstannyń kópqyrly ózara tıimdi yntymaqtastyǵyn jan-jaqty damytý úshin Sizben birge bar kúsh-jigerimizdi jumyldyrýǵa nıetti ekenimizdi aıtqym keledi.
Shyn júrekten Sizge zor densaýlyq, uzaq ǵumyr jáne dostas Qazaqstannyń turaqtylyǵy men órkendeýi jolyndaǵy memlekettik qyzmetińizge jańa jetistikter tileımin», – delingen quttyqtaý hatta.
***
Qyrǵyz Respýblıkasynyń Prezıdenti Almazbek Atambaev Memleket basshysyn týǵan kúnimen quttyqtap, táýelsiz Qazaqstannyń barlyq jetistigi Nursultan Nazarbaevtyń júrgizip otyrǵan syndarly saıasatynyń nátıjesi ekenin aıtty.
«Sizdiń kásibı ári ómirlik mol tájirıbeńiz Qazaqstan halqynyń tolyq qoldaýyna ıe bolǵan kópqyrly jáne jemisti memlekettik qyzmetińizdiń berik negizi bolyp tabylady.
Qazaqstan men Qyrǵyzstannyń teń quqyly ári ózara tıimdi yntymaqtastyq qaǵıdattaryna negizdelgen dostyq, tatý kórshilik jáne strategııalyq seriktestik qarym-qatynasy aldaǵy ýaqytta da baýyrlas elderimizdiń ıgiligi úshin nyǵaıyp, damı beretinine senimdimin», – delingen jedelhatta.
***
Túrikmenstan Prezıdenti Gýrbangýly Berdimuhamedov Qazaqstan Prezıdentiniń eki el arasyndaǵy áriptestikti damytýdaǵy jeke úlesin joǵary baǵalap, ekijaqty qarym-qatynasty odan ári nyǵaıtýǵa senim bildirdi.
«Osy jaqsy múmkindikti paıdalana otyryp, Nursultan Ábishuly, Sizge amandyq, ómirlik kúsh-qýat, sondaı-aq baýyrlas Qazaqstan halqynyń berekesi men ósip-órkendeýi jolyndaǵy joǵary memlekettik laýazymda odan ári tabystarǵa jetýge tilektespin», – delingen hatta.
***
Serbııa Respýblıkasynyń Prezıdenti Aleksandr Výchıch te Nursultan Nazarbaevty týǵan kúnimen quttyqtap, Qazaqstan Prezıdentine zor densaýlyq, amandyq pen baqytty ǵumyr tiledi.
«Sizge Prezıdent laýazymynda, Qazaqstan Respýblıkasynyń ıgiligi úshin jáne jeke ózińiz zor úles qosyp otyrǵan elderimiz arasyndaǵy yntymaqtastyq jolynda tabystarǵa jetýge nıettestigimdi bildiremin», – delingen quttyqtaý hatta.
***
Armenııa Respýblıkasynyń Prezıdenti Serj Sargsıan Astanadaǵy «EKSPO-2017» kórmesiniń saltanatty ashylý rásiminiń joǵary deńgeıde uıymdastyrylǵanyn aıtyp, Nursultan Nazarbaevtyń elimizdi damytý, onyń halyqaralyq arenadaǵy bedelin arttyrý jáne Qazaqstan men Armenııanyń qarym-qatynasyn nyǵaıtý isindegi zor úlesin atap ótti.
«Armıan men qazaq halqynyń arasyndaǵy dostyq jáne bir-birin qurmetteý dástúri ekijaqty saıası, saýda-ekonomıkalyq jáne gýmanıtarlyq seriktestikti keńeıtýde mańyzdy ról atqarady», – delingen jedelhatta.
S.Sargsıan Memleket basshysyna zor densaýlyq pen amandyq, al Qazaqstan halqyna beıbitshilik pen ósip-órkendeý tiledi.
***
Reseı Federasııasy Úkimetiniń tóraǵasy Dmıtrıı Medvedev Reseı Federasııasy Úkimeti jáne jeke óziniń atynan Qazaqstan Prezıdentin týǵan kúnimen quttyqtady.
D.Medvedev energetıka, ónerkásip, kólik ınfraqurylymy, ǵylym jáne mádenıet salalaryndaǵy birlesken ózara tıimdi jobalardyń iske asyrylý nátıjelerine toqtalyp, eki eldiń qoǵamdyq birlestikter men bıznes-qoǵamdastyqtar arasyndaǵy dıalogtary qarqyndy ekenine nazar aýdardy.
«Úkimetterimizdiń seriktestikke negizdelgen odan arǵy jumysy ekijaqty yntymaqtastyqtyń barlyq máselelerin damytýǵa, túrli salalarda tyń ári perspektıvti bastamalardy iske asyrýǵa, Eýrazııalyq ekonomıkalyq odaq aıasyndaǵy ıntegrasııalyq ózara is-qımyldy nyǵaıtýǵa yqpal etetine senimdimin», – delingen jedelhatta.
