Osy kúnge deıin «Taraz» fýtbol klýbyna qatysty jıi syn aıtylyp keldi. Máselen premer-lıganyń osy ýaqytqa deıingi kezeńinde «Taraz» komandasy 5 ret jeńiske jetip, 5 ret teń túsken eken. Sondaı-aq oıyn barysynda 9 komandadan jeńilis tapqan «Taraz» quramasy qazirgi tańda 20 upaı ıelenip, týrnır kestesinde 7 orynda keledi. Fýtbolshylar osy kezeńge deıin ózge komandalar qaqpasyna 17 gol soqqanymen, óz qaqpalaryna 28 gol jiberip alǵan.
Alaıda jýyrda ǵana «Taraz» fýtbol klýbynyń Atyraý tórinen abyroıǵa kenelip qaıtqany sportsúıer qaýymǵa belgili. Fýtboldan Qazaqstan premer-lıgasynyń 19-týry aıasynda Atyraý qalasynda jergilikti komandaǵa qarsy alańǵa shyqqan «Taraz» fýtbolshylary qarsylastaryn 3:1 esebimen utqan bolatyn. Tóreshilerdiń aıtýynsha, kezdesýdiń on jetinshi mınýtynda Jan-Ed Morrıs mergendigimen kózge túsip, «Taraz» komandasyn alǵa shyǵarǵan. Sondaı-aq, kezdesýdiń alpys tórtinshi mınýtynda Marat Haırýllın tarazy basyn teńestirdi. Budan keıingi mınýttarda da ese jibere qoımaǵan olar sátti oıyn kórsetip, esebin túgendep qaıtqan bolatyn. Tipti mamandar «Taraz» qurama komandasy jeńisti jolyn jalǵastyra beretin bolsa, alǵashqy altylyqqa enýge múmkindigi bar dep otyr.
Jýyrda ǵana «Taraz» komandasynda birqatar oıynshylar aýysty. Fýtboldan Qazaqstan premer-lıgasynyń jazǵy transferlik terezesi ashylǵannan beri «Taraz» komandasynyń quramy tórt birdeı jańa oıynshymen tolyqty. Budan bylaı senegaldyq surmergen atanǵan Malık Mane, qurama sapynda ótken jyly oınaǵan Ilıa Vorotnıkov, Evgenıı Gorııachıı men jartylaıqorǵaýshy Rınat Haırýllın «Taraz» quramasynda óner kórsetedi. Jyl basynda Evgenıı Gorııachııdiń «Qaısar» komandasynyń namysyn qorǵaǵany el esinde. Endi ol aldaǵy ýaqyttarda «Taraz» komandasynyń namysyn qorǵaıtyn bolady. Jankúıerler de jańa oıynshylardan úlken úmit kútip otyr.
Al «Taraz» fýtbol komandasynyń quramynda óner kórsetip kelgen Rýslan Mýhametshın, Madııar Raıymbek jáne Maksım Azovskıı syndy oıynshylar basqa komandaǵa aýysýlaryna baılanysty qurama qatarynan shyǵaryldy.
Hamıt Esaman,
«Egemen Qazaqstan»
Jambyl oblysy
