Bank ókilderiniń aıtýynsha, jyldyq ınflıasııa deńgeıi Ulttyq banktiń boljamdy baǵalarymen sáıkes keledi jáne nysanaly dáliz sheńberinde qalyp otyr, ınflıasııalyq kútýler turaqty deńgeıde qalyptasqan. "Inflıasııalyq táýekelder jekelegen taýar naryqtarynda týyndaıtyn usynys faktorlary jáne syrtqy parametrlerdiń ekonomıkanyń damýynyń bazalyq ssenarııinen aýytqýy tarapynan bolýy múmkin", - delingen habarlamada.
Soǵan qaramastan, boljamdy ınflıasııanyń orta merzimdi kezeńdegi baıaýlaý traektorııasy naqty paıyzdyq bazalyq mólsherlemeniń ekonomıkanyń áleýetti qarqynyna sáıkes kelýin qamtamasyz etý maqsatynda qysqa merzimdi perspektıvada da, aldaǵy 12-18 aıda da bazalyq mólsherlemeniń tómendeý yqtımaldyǵyn arttyratyny aıtylady. "2017 jylǵy maýsymda jyldyq ınflıasııa 7,5 paıyz boldy jáne Ulttyq banktiń nysanaly dálizi sheńberinde (6-8 paıyz) saqtalyp otyr. Inflıasııanyń aǵymdaǵy jylǵy 1-shi jartyjyldyqta (3,7 paıyz) 2016 jylǵy 1-jartyjyldyqpen (4,6 paıyz) salystyrǵanda edáýir tómen bolýy, sondaı-aq jyldyń basynan beri aıtarlyqtaı baıaýlaıtyn jáne jalpy ınflıasııamen salystyrǵanda aıtarlyqtaı tómen deńgeıde qalyptasatyn baǵa kúızelisteri men aýytqý quraýyshtary kirmeıtin bazalyq ınflıasııa kórsetkishteri ınflıasııanyń tómendeý úrdisiniń mańyzdy belgileri bolyp tabylady. Bazalyq ınflıasııa maýsymda 6,8 paıyz (2016 jylǵy jeltoqsanda - 8,9% paıyz) boldy", - deıdi bank ókilderi.
Azyq-túlik naryǵynyń jekelegen segmentterindegi ahýal sońǵy aılardyń qysqa merzimdi ınflıasııalyq táýekeli boldy, alaıda jańa ónim kezeńiniń bastalýy azyq-túlik baǵalarynyń jalpy serpinindegi jaǵymsyz úrdisterdi rettedi. Sondaı-aq, halyqtyń ınflıasııalyq kútýleri 2017 jyldyń basynan beri turaqtylyqty saqtap otyr eken. Maýsymda ınflıasııanyń bir jyl alǵa berilgen sandyq baǵasy 6,4 paıyz boldy jáne naqty ınflıasııa deńgeıinen tómen, sondaı-aq ınflıasııa dáliziniń 2018 jylǵa arnalǵan sheginde qalyp otyr. Maýsym aıynda jasalǵan pikirterim nátıjeleri qabyldanatyn jyldyq ınflıasııa men halyqtyń bir jyl alǵa arnalǵan kútýleri azdap tómendegenin kórsetken.
"Syrtqy taýar naryqtaryndaǵy ahýal qubylmalylyǵymen sıpattalady. Munaı baǵasynyń bir barrel úshin 50 dollardan tómen deńgeıde qalyptasýy jáne mamyrda-maýsymda álemdik azyq-túlik naryqtaryndaǵy baǵa ındeksiniń ósýiniń, negizinen, sút ónimderi men dándi-daqyldardyń qymbattaýy saldarynan jyldamdaýy ınflıasııalyq aıanyń kúsheıýine ákep soǵýy múmkin. Salymshylardyń valıýtalyq basymdyqtary teńgemen aktıvterdiń paıdasyna saqtalýda. Maýsymnyń aldyn ala derekteri boıynsha teńgemen depozıtter úlesiniń valıýtalyq depozıtter úlesinen asyp ketýi odan ári jalǵasýda. Teńgemen kredıtter úlesiniń ósýi de baıqalýda. Bul rette kredıttik resýrstarǵa degen suranys turaqty bolyp qalýda jáne mólsherlemelerdiń birtindep tómendeýimen qatar júrýde. Kredıtteýdiń qysqa merzimdi serpini bank sektoryndaǵy shoǵyrlaný prosesterimen shektelýde.
Ekonomıkada iskerlik belsendilik jandanýyn jalǵastyrýda, ishki ekonomıkalyq kórsetkishter serpini qalypqa kelý úrdisiniń saqtalǵanyn kórsetip otyr. Máselen, maýsymda eldegi jıyntyq usynysty kórsetetin qysqa merzimdi ekonomıkalyq ındıkatordyń ósýi jyldyq kórsetkish boıynsha 107,4 paıyz boldy. Alaıda halyqtyń aǵymdaǵy jylǵy naqty kiristeri boıynsha baǵalaý derekterin statıstıkalyq vedomstvonyń aıtarlyqtaı tómendeý jaǵyna qaraı qaıta qaraýy tutyný suranysynyń odan arǵy serpininiń belgisizdigine sebepshi bolýda. Aqsha-kredıt sharttary beıtarap kúıde qalýda. Artyq ótimdilik jaǵdaıynda aqsha naryǵynyń mólsherlemeleri paıyzdyq dálizdiń tómengi sheginde saqtalýda. Aǵymdaǵy jylǵy úshinshi toqsanda bank sektorynyń qarjylyq ornyqtylyǵyn arttyrý baǵdarlamasynyń iske qosylýyna baılanysty keıinnen onyń kredıttik belsendiliginiń qalpyna kelýi kútiledi", - delingen qarjy retteýshisiniń habarlamasynda.
