Senatorlar Zelenov aýdany Pavlov aýylyndaǵy sý qubyry qurylysy men medısınalyq pýnkttiń tolyq jóndeýden ótkizý barysymen tanysty. Sondaı-aq, depýtattar Mahambet aýylynda ornalasqan «Altyn bolashaq», «Shunaıbekov», «Shkanov» sharýa qojalyqtarynyń ujymymen kezdesti.
Budan bólek, senatorlar Terekti aýdanyna baryp, Podstepnoe, Novopavlovka, Aqsýat aýyldarynda qurylys obektilerin, sharýa qojalyqtaryn aralady.
Jergilikti halyqtyń aldynda sóz sóılegen Erbolat Muqaev aýyl turǵyndaryn Prezıdent N.Nazarbaevtyń aýyl sharýashylyǵyn Qazaqstan ekonomıkasynyń draıverleriniń birine aınaldyrý jónindegi tapsyrmasyn júzege asyrý úshin jumyla eńbektenýge shaqyrdy.
Kezdesýge qatysýshylar parlamentshilermen agrarlyq salany damytýdaǵy aımaqtyń túıtkildi máselelerin talqylady. Depýtattar turǵyndardy jumyspen qamtýdyń, sondaı-aq, aýyldyqtarǵa eńbegine laıyqty aqy tóleýdiń mańyzdylyǵyn atap ótti.
* * *
Parlament Májilisiniń depýtaty, «Nur Otan» partııasy parlamenttik fraksııasy jetekshisiniń orynbasary, Ekonomıkalyq reforma jáne óńirlik damý komıtetiniń tóraǵasy Nurtaı Sabılıanov Shyǵys Qazaqstan oblysynyń eldi mekenderinde saılaýshylarmen kezdesý ótkizýde.
Eki kúnniń ishinde depýtat Aıagóz aýdanynyń Tarbaǵataı, Aqshy, Qaraǵash, Saryarqa, Barshatas, Qosaǵash, Mádenıet, Aıǵyz aýyldarynda kezdesý ótkizdi. Kezdesýde depýtat saılaýshylarǵa Qazaqstan Prezıdenti N.Nazarbaevtyń «Qazaqstannyń Úshinshi jańǵyrýy: jahandyq básekege qabilettilik» Qazaqstan halqyna Joldaýynyń naqty baǵyttary, bılik tarmaqtary arasynda ókilettikterdi qaıta bólý máseleleri jáne Memleket basshysynyń «Bolashaqqa baǵdar: rýhanı jańǵyrý» baǵdarlamalyq maqalasy týraly aıtyp berdi.
Saılaýshylar óz kezeginde aýyl sharýashylyǵyn, kásipkerlikti damytý, mıkronesıeleý, aýyz sýmen qamtamasyz etý, kólik joldaryn jóndeý, eldi mekenderdiń ınfraqurylymyn damytý máseleleri, medısınalyq qyzmetter kórsetý sapasyn jaqsartý, halyqty jumyspen qamtý, áleýmettik qamsyzdandyrý, bilim salasyn jaqsartý, ınternet jelisi, áleýmettik nysandardy qurý jáne basqa da máselelerdi kóterdi.
Sondaı-aq, kezdesý barysynda N.Sabılıanov azamattardy jeke máseleleri boıynsha qabyldady.
* * *
Batys Qazaqstan oblysynda jumys saparymen júrgen Májilis depýtaty, tarıh ǵylymdarynyń doktory, general-leıtenant Abaı Tasbolatov Oralda Ulttyq ulan jaýyngerlerimen kezdesti.
Depýtat aldymen óńirlik qolbasshylyq basqarmasy men 5517-áskerı bóliminiń shtabynda, jaýyngerlik dańq mýzeıinde boldy. Sodan keıin «Batys» óńirlik qolbasshysy, general-maıor Álibek Serálıev májilismendi áskerı bólimniń oqý úderisimen, kúndelikti tynys-tirshiligimen tanystyrdy.
A.Tasbolatov áskerı qyzmetshilerge elimizdiń 2050 jylǵa deıingi damýynyń strategııalyq baǵdarlamasynyń negizgi baǵyttary, zań shyǵarýshylyq qyzmet barysynda atqarylǵan jumystar jóninde áńgimelep berdi. Sonyń ishinde qazir Májiliste qaralyp jatqan áskerı qyzmetshilerge arnalǵan turǵyn úı tujyrymdamasy týraly da aıtyldy.
– Qazirgi tańda Ulttyq ulan jaýyngerleri naqty mindetti oryndaýda. Olar kún saıyn, aýa raıyna qaramastan, qolyna qarý ustap, el tynyshtyǵyn, mańyzdy nysandardy kúzetýde. Bul oqý-jattyǵý emes, sondyqtan áskerı qyzmetshiler barlyq baılanys jáne kólik quraldarymen tolyq qamtamasyz etilýi tıis. Memleket basshysy tarapynan Ulttyq ulanǵa udaıy kóńil bólinip keledi. Beıbit kún kúzetinde turǵan áskerı qyzmetshilerdiń áleýmettik jaǵynan qorǵalýyn da esten shyǵarmaý kerek, – dedi A.Tasbolatov.
* * *
Aqtóbege kelip, Áıteke bı, Hromtaý aýdandary men birneshe aýyldy aralaǵan Parlament Májilisiniń depýtattary Gleb Shegelskıı, Quralaı Qaraken, Asylbek Smaǵulov Aqtóbe – Or baǵytyndaǵy tas joldyń qurylysymen tanysty.
Eki jylǵa josparlanǵan qurylys jumysy 2018 jyly aıaqtalady. Qurylys jumystaryna respýblıkalyq bıýdjetten 3 mıllıard teńgeden astam qarjy bólingen.
«8 shaqyrymdyq jol qurylysy jumystaryna 100-den astam adam jumyldyrylǵan. «Nur Otan» partııasy fraksııasynyń komıssııasy toqsan saıyn qurylys jumystaryn qarap, qarjynyń tıimdi jáne maqsatty jumsalýyn baqylaıdy», – dedi Májilis depýtaty Gleb Shegelskıı.
«Jol qurylysy ýaqtyly júrip jatyr. Qıyrshyq tas, qum, ballast sekildi qurylys materıaldarynyń bári jergilikti jerden alyndy. Joldyń 6,5 shaqyrymy bıyl paıdalanýǵa beriledi», – dedi Aqtóbe oblystyq jolaýshylar kóligi jáne avtomobıl joldary basqarmasynyń basshysy Aıazbaı Osmanǵalıev.
Májilis depýtattary óńirge sapary kezinde «Nurly jol» baǵdarlamasymen salynyp jatqan mektep qurylysymen tanysyp, aýyl turǵyndarymen sóılesti.
«Egemen-aqparat»
