Shara barysynda Qazaqstan Respýblıkasy men Ispanııa Koroldigi arasynda birqatar mańyzdy qujattarǵa qol qoıyldy.
«Búgin biz densaýlyq saqtaý salasyndaǵy úzdik kompanııalardyń biri «EUROFINSA S.A.» kompanııasymen memorandýmǵa qol qoıdyq. Bizdiń seriktesterimiz Qazaqstandaǵy memleket-jekemenshik áriptestigine at salysýǵa yntaly. Dálirek aıtsaq, zamanaýı klınıkalar salý, tehnologııa almasý, medısınalyq nysandar qurylysynan bastap, qural-jabdyq jetkizý men onyń odan ári qoldanylýyna deıin aınalysatyn bolady. Qazir biz sheteldik ınvestorlarǵa arnap jobalardyń toptamasyn ázirleýdemiz. Bul Almaty men Astana qalalarynda stýdenttik klınıkalar salý men aýdandarda ınfraqurylymdyq jobalardy júzege asyrý», deıdi Densaýlyq saqtaý vıse-mınıstri Alekseı Soı.
«Biz memorandýmdarǵa qol qoıylǵandyǵyna óte qýanyshtymyz. Bul arqyly Qazaqstanmen sanıtarlyq qyzmet salasynda seriktestiktiń negizi qalanýda dep esepteımin. Bizde álem boıynsha 30 shaqty jobamyz bar. Búginnen bastap Qazaqstanmen seriktestiktiń bastalǵanyna dán rızamyz. Bizdiń kompanııanyń densaýlyq saqtaý salasynda jınaǵan tájirıbesi mol. Sondyqtan bar bilgenimizben Qazaqstanda bóliskimiz keledi. Sońǵy 5 jyl ishinde 2 mıllıard AQSh dollaryn túrli mańyzdy jobalarǵa ınvestısııaladyq», deıdi «EUROFINSA» kompanııasynyń óńirlik dırektory Ignasıo Kasanovas.
2017 jylǵy 15 shildede Astanada Qazaqstan Respýblıkasynyń Syrtqy ister mınıstri Qaırat Ábdirahmanov jáne Ispanııa Koroldiginiń Qazaqstan Respýblıkasyndaǵy Tótenshe jáne ókiletti elshisi Pedro Hose Sans Serrano Qazaqstan Respýblıkasynyń Úkimeti men Ispanııa Koroldiginiń úkimeti arasyndaǵy qupııa aqparatty ózara qorǵaý týraly kelisimge qol qoıdy.
Sonymen qatar, shara barysynda Qazaqstan Respýblıkasy Densaýlyq saqtaý mınıstrligi men «EUROFINSA» kompanııasy arasyndaǵy Qazaqstan Respýblıkasynyń densaýlyq saqtaý salasyndaǵy ınfraqurylym men memleket-jekemenshik áriptestigin damytý jónindegi yntymaqtastyq týraly memorandýmǵa qol qoıyldy.
Búginnen bastap Qazaqstan Ispanııamen avıasııa salasynda da seriktes atandy. «Qazaqstandaǵy avıasııalyq ındýstrııa» JShS bas dırektorynyń mindetin atqarýshy Syrymbek Sádýaqasov jáne «Airbus Defense and Space» kompanııasynyń áskerı ushaqtardy satý boıynsha basshysy Oskar Alonso Romero «Qazaqstandyq avıasııalyq ındýstrııa» JShS jáne «Airbus Defense and Space» kompanııasy arasyndaǵy tehnıkalyq qoldaý salasyndaǵy yntymaqtastyq týraly kelisimge qol qoıdy.
Taǵy bir jaǵymdy jańalyq, «Astana» áleýmettik-kásipkerlik korporasııasy» ulttyq kompanııasy» aksıonerlik qoǵamy basqarmasynyń tóraǵasy Aıdarbek Qojanazarov jáne «IMASA» kompanııasynyń halyqaralyq dırektory Lýıs Gosnego «Astana» áleýmettik-kásipkerlik korporasııasy» ulttyq kompanııasy» aksıonerlik qoǵamy men «IMASA» kompanııasy arasyndaǵy Astana qalasynda modýldi qurylymdardy paıdalanatyn zaýytty qurý jónindegi yntymaqtastyq týraly memorandýmǵa qol qoıyldy.
Eki eldiń ókilderi birlesip EKSPO-2017 halyqaralyq kórmesi aýmaǵynda ornalasqan Ispanııa Koroldiginiń pavılonyn tamashalady. Shara sońynda qonaqtar estelik sýretke túsip, kórme týraly jyly lebizderimen bólisti.
Aıgúl ShERNIIаZ,
«Egemen Qazaqstan»
