Elbasynyń «Bolashaqqa baǵdar – rýhanı jańǵyrý» maqalasyndaǵy «patrıotızm kindik qanyń tamǵan jerińe, ósken aýylyńa, qalań men óńirińe, ıaǵnı týǵan jerge degen súıispenshilikten bastalady» degen maǵynasy tereń sózder jas urpaqty ata-baba amanatyna adal bolýǵa , rýhanı qundylyqtardy qasterleýge jeteleıdi. Táýelsizdikten keıin dúnıege kelgen býyn atamekenniń qadir-qasıetin jaqsy túsinedi. Oǵan qatysty kez kelgen aksııalarǵa belsene qatysady. Bir sózben aıtqanda, jalpyulttyq patrıotızmniń kórinisterin bilimmen de, naqty istermen de dáleldep keledi. Sonyń bir úlgisine «Týǵan jer» jáne «Qazaqstannyń 100 esimi» jobalary aıasynda óńir mektep oqýshylary arasynda qurylǵan ekspedısııalyq toptardy atar edik. Jýyrda olardyń bir legi ólkeniń 13 aýdanyn aralap, tarıhı-mádenı oryndardy, kórikti jerlerdi tamashalap qaıtty.
– Ekspedısııanyń basty maqsaty – jastardyń boıynda elge, jerge degen súıispenshilik sezimdi qalyptastyrý. Biz alǵashqy sapardy Esil aýdanynan bastap, jurtshylyq jadynda «Sary áýlıe» esimimen qasterlenetin Qulsary batyrdyń basyna zııarat ettik. Byltyrlary onyń qorymyna úlken kesene turǵyzylǵan bolatyn. Mundaı qasıetti oryndar oblysta kóptep sanalady, – deıdi ál-Farabı atyndaǵy mektep-lıseıdiń dırektory Kúlimkóz Smaılova.
Onyń jetekshiligindegi top Aıyrtaý, Ýálıhanov, Aqjar, Aqqaıyń aýdandarynda bolyp, 1100 shaqyrym joldy eńsergen. Aǵyntaı men Qulsary batyr mazarlary, Aıǵanym qonysy, Shoqan Ýálıhanovtyń murajaıy, Qalmaqqyrylǵan tóbesi oqýshylarǵa erekshe áser etken. Myrzaǵul aýyly janyndaǵy Teke, Saýmalkóldegi Imantaý men Shalqar kólderi, Taldysaı ózeni – árqaısysynyń tylsym jumbaqtary men qatparly syrlaryn bilmekke qumartqan.
Ǵ. Músirepov, Tımırıazev aýdandaryndaǵy ulylar meken etken, izi qalǵan kıeli jerlermen júrip ótken.
Jas balǵyndar ólkeniń erekshe tarıhy, tamasha adamdary, ásem tabıǵaty, sáýlet óneri men mádenıeti jaıly tanymdyq aqparattar jınastyryp, jeke albom qurastyrýdy, qysqametrajdy fılm daıyndaýdy kózdep otyr.
О́ńirimizde bastaý alǵan etnografııalyq ekspedısııa munymen aıaqtalmaq emes. Alda kıeli Túrkistan jerine sapar shegip, tarıhı eskertkishtermen tanysý josparlanǵan.
О́mir ESQALI,
«Egemen Qazaqstan»
Soltústik Qazaqstan oblysy
