Qoǵamdyq tyńdaý barysynda atalǵan sharanyń barysy týraly aıtylyp, qatysýshylardyń pikirleri men eskertpeleri tyńdaldy. «Jastar» ǵylymı-zertteý ortalyǵynyń dırektory Talǵat Qalıevtiń aıtýynsha, osyndaı úlken lager uıymdastyrý eldiń turaqtylyǵy men damýynyń belgisi ispetti. «Eldiń rýhanı jańǵyrýyn osyndaı baılanystar arqyly damyta alamyz. Sondaı-aq, bul jastardyń básekelestikke qabilettiligin arttyryp, bilim kókjıegin keńeıtetini sózsiz», – deıdi Talǵat Qalıev.
«Nur Otan» partııasy «Jas Otan» JQ tóraǵasy Danııar Manarbekuly atap ótkendeı, jazǵy lagerde Túrki keńesi jastary arasynda mádenıet aralyq baılanys, jastar saıasaty salasynda ozyq tájirıbe men ınnovasııalyq jobalar almasty.
Jıynǵa kelgen qonaqtar da jazǵy lagerge qatysty óz pikirlerimen bólisti. Qazaqstan KVN Odaǵynyń Prezıdenti Esen Eleýkenniń pikirinshe, túrki jastarynyń basyn biriktiretin jobalardyń kóp bolýy quptarlyq áreket. «Bizdiń KVN Odaǵy da túrki jastaryna arnalǵan «Jaıdarman» oıyndaryn uıymdastyryp keledi. Bastapqyda onyń ómirsheńdigine kúmánmen qaraǵandar bolǵan. Alaıda túrki jastary arasynda «Jaıdarman» ótkizýdiń múmkin ekenin dáleldeı aldyq. Osy oraıda, jazǵy lagerge qatysatyn elder sanyn arttyrýdy usynǵym keledi. Máselen, kórshi Reseıdegi túbi túrki ulttar Qazaqstanǵa úlken úmitpen qaraıdy», – deıdi Esen Eleýken.
Jazǵy lagerdi uıymdastyrýshylary sharaǵa áýeli Túrki keńesiniń quramyndaǵy memleket ókilderin ǵana shaqyrǵan eken. Alaıda aldaǵy ýaqytta qatysýshy elder sanyn ulǵaıtatynyn aıtady. Al Din isteri jáne azamattyq qoǵam mınıstrligi ókilderi mundaı jazǵy lagerdi jyl saıyn ótkizý josparda bar ekenin jáne ony ár elde uıymdastyrylatynyn málimdedi.
Sonymen qatar, qoǵamdyq tyńdaýdyń sońynda «Nur Otan» partııasy «Jas Otan» jastar qanaty tóraǵasy Danııar Súndetbaev pen «Hazar» Ázerbaıjan etno-mádenı ortalyǵy» jastar qanaty tóraǵasy Inaıat Mıftalıev «Qazaqtar sekildi ómir súrý» jobasyn júzege asyrý boıynsha memorandýmǵa qol qoıdy. Joba uıymdastyrýshylary 3 aı merziminde 16 oblys, 22 qalany aralap, kópshilikke halqymyzdyń mádenıetin, turmys-tirshiligin, dástúrin, folkloryn tanystyrýdy maqsat etip otyr.
Esterińizde bolsa, 10-16 shilde aralyǵynda Aqmola oblysy, Zerendi aýylynda Din isteri jáne azamattyq qoǵam mınıstrligi jáne «Jas Otan» jastar qanaty korporatıvtik qorynyń uıymdastyrýymen Túrki keńesiniń halyqaralyq jazǵy lageri ótken bolatyn. Oǵan Qazaqstan, Ázirbaıjan, Túrkııa jáne Qyrǵyzstan elderinen kelgen 100-ge jýyq belsendi jastar qatysty. Tórt eldiń jastaryn jınaǵan jıyn barysynda top qurýǵa arnalǵan trenıngter, kóshbasshylyq qabiletti damytý tásilderi, SMM júrgizýge baılanysty semınarlar ótkizildi. Sharaǵa jınalǵandar jastar saıasatyn júrgizýge arnalǵan jobalardy iske asyrýdyń ádisterimen bólisip, tájirıbe almasty. Sondaı-aq, qatysýshylar Elbasynyń «Bolashaqqa baǵdar: rýhanı jańǵyrý» maqalasynyń negizgi basymdyqtaryna baǵyttalǵan dıskýssııalyq alań ótkizdi.
Lagerdi uıymdastyrýshylardyń sózine súıensek, bul shara túrki memleketteri arasyndaǵy qatynastyń jaqsarýyna, mádenıet aralyq baılanysqa, túrli deńgeıdegi jastar jobalaryn biriktirýge múmkindik jasaıdy. Sondaı-aq, ashyq pikir almasý jáne jastar uıymy men kóshbasshylary qarym-qatynasyn nyǵaıtý da osy jazǵy lagerdiń maqsattarynyń biri.
Abaı Asankeldiuly,
«Egemen Qazaqstan»
