Derbes menedjer qyzmetin paıdalanǵan adam túrli anyqtamalardy jınap áýre bolmaıdy, ol jumysty memlekettik korporasııanyń qyzmetkeri atqarady. Derbes menedjer memlekettik qyzmetti jeke kórsetedi, qajetti anyqtamalardy jınaıdy, qajet bolǵan jaǵdaıda, bankke de barady, qujattyń telnusqasyn jaramsyz dep taný týraly gazetke habarlandyrý beredi jáne t.b.
«Azamattarǵa arnalǵan úkimet» memlekettik korporasııasynyń Basqarma tóraǵasy Abylaıhan Ospanovtyń aıtýynsha, qazirgi ýaqytta kóptegen qyzmetterdi alý úshin qajetti qujattar tizbesi barynsha azaıtylǵan.
«Alaıda, HQKO-dan basqa da mekemelerge barýǵa týra keletin «kúrdeli» qyzmetter bar. Mysaly, avtosalonnan nesıege nemese bólip tóleýge kólik satyp alǵan kezde, bizdiń derbes menedjerimiz ózdiginen jyljymaly múlik kepilin tirkeıdi, kólikti esepke qoıady jáne qajet bolsa, barlyq daıyn qujattardy úıge jetkizip beredi», - dep túsindirdi Ospanov.
Jańa servıs memlekettik korporasııanyń oblystyq mańyzy bar qalalardaǵy 37 front-ofısterinde, sondaı-aq Astana men Almaty qalalarynda iske qosyldy, ol HQKO-ǵa barýǵa jáne qujattar jınaýǵa ýaqyty joq jandarǵa arnalyp otyr. Joba bankten nesıe alýshylar, kólik satyp alýshylar men bıznes ókilderi arasynda suranysqa ıe bolady dep boljanýda.
A.Ospanovtyń aıtýynsha, derbes menedjer qarapaıym anyqtamalar boıynsha keńester alý úshin ǵana emes, basqa da óte suranysqa ıe «kúrdeli» memlekettik qyzmetterdi, onyń ishinde jyljymaıtyn múlik obektisin jáne kepil shartyn tirkeý, jer ýchaskesine jekemenshik quqyǵyna aktilerdi resimdeý jáne alý, jeke jáne zańdy tulǵalar úshin notarıaldy kýálandyrýsyz jyljymaıtyn múlikke satý-satyp alý/almastyrý/syıǵa tartý sharttaryn jasaı otyryp, tirkeý qyzmetteri úshin qoljetimdi bolyp tabylady. Keleshekte bul tizim ulǵaıatyn bolady. Azamattyń atyna qujattardy jınaýdy korporasııa qyzmetkeri notarıaldy kýálandyrylǵan senimhat negizinde júzege asyratyn bolady.
Keńester berýdi derbes menedjer telefon, «Telegram» jáne «Whatsapp» veb-messendjeri arqyly dúısenbi men senbi aralyǵynda saǵat 9.00-den 20.00-ge deıin júrgizedi, al daıyn qujattar qyzmet alýshynyń elektrondyq poshtasyna jiberiledi nemese óz qolyna jetkiziledi. Derbes menedjer qajet bolǵan jaǵdaıda, tapsyrys berýshiniń úıine barady.
Derbes menedjerdiń qyzmeti jeke jáne zańdy tulǵalarǵa aqyly túrde kórsetiledi. Mundaı qyzmettiń quny memlekettik kórsetiletin qyzmettiń kúrdeliligine jáne eldi mekenniń ornalasqan jerine baılanysty bolady.
Eske sala keteıik, osyǵan deıin taǵy bir pılottyq joba júzege asyrylyp, onda elimizdegi barlyq HQKO-da kýálikti alý ýaqyty qysqarǵan bolatyn.
