Qutqarýshylar der kezinde kómekke jetpegende onyń aqyry qaıǵyly oqıǵaǵa soqtyrary kádik edi. Mamlıýt qalasynyń 9-synyp oqýshysy aıryqsha sýret jasap, qurbylaryn tańdandyrmaq bolǵan. Sóıtip, qolyna uıaly telefonyn alyp, joǵary voltty baǵanaǵa shyqqan. Qas-qaǵym sátte tok soqqanyn ózi de ańǵarmaı qalǵan.
Mamlıýt aýdanynyń IIB kezekshi bólimine jas jigittiń baǵanada asylyp turǵany jaıly habarlama kelip túsken. Elektrshiler oqıǵa oryn alǵan jerge jedel jetip, kerneýdi toqtan ajyratqan. Mektep oqýshysy shuǵyl túrde aýrýhanaǵa jetkizilip, jedel járdem kórsetilgen. Qýanyshqa oraı, «ózimshil» áýesqoıdyń selfıge áýestigi kúıik jaraqatyn alýmen ǵana shektelgen. Qazirgi ýaqytta densaýlyǵy qalypty bolǵanymen, ábden úreılenip qalǵany baıqalady.
«Balalar bıik ǵımarattarda, sýdyń jaǵasynda jáne basqa da jerlerde aıryqsha sýretke túsýge qumar. Bylaı qaraǵanda qaýip joq sııaqty. Biraq jeldiń ekpini, elektr kerneýi, topyraqtyń opyrylý sekildi adam ómirine qaýip tóndiretin qubylystardy eskere bermeıtini ókinishti. Sondyqtan eresekter balalarǵa selfımen áýestenýdiń qaýiptiligin túsindirýi qajet. Álemniń kóptegen elderinde monopodtardy paıdalanýǵa arnaıy tyıym salynǵan», delingen oblystyq ishki ister departamentiniń baspasóz qyzmeti taratqan aqparatta.
О́mir Esqalı.
«Egemen Qazaqstan»
Soltústik Qazaqstan oblysy
