Ajary aıshyqty elorda kórkinen shabyt alǵan túsirilim toby bir ǵımarattyń ǵana emes, Arqa tósine boı kótergen tutas Astananyń qalyptasý tarıhyn beıneleýdi uıǵarǵan. Fılm Dýbaıdaǵy «Býrdj-Halıfa», Kýala-Lýmpýrdaǵy «Petronas», La-Mansh buǵazyndaǵy Eýrotonnel syndy álemniń ataqty ǵımarattarynyń qurylys tarıhy kórsetiletin «Megaǵımarattar» derekti serıalynyń bir epızody bolyp tabylady.
Týyndyda Qazaqstan astanasyndaǵy qolaısyz aýa raıy men kúrdeli logıstıkalyq, ınfraqurylymdyq jaǵdaılarǵa qaramastan «Báıterek» monýmenti, «Han Shatyr» saýda jáne oıyn-saýyq ortalyǵy sııaqty iri nysandardyń, jańa vokzal men Nursultan Nazarbaev halyqaralyq áýejaıynyń turǵyzylýy týraly baıandalady. Basty nazar shynydan turǵyzylǵan álemdegi eń úlken sferalyq ǵımarat – «Nur álem» pavılonyna aýdarylady. National Geographic túsirilim toby sferanyń sońǵy shynysy ornatylǵan tarıhı mezetti de túsirip alǵan.
Túsirilim jumystaryna Qazaqstan Prezıdenti Nursultan Nazarbaev qatysyp, óz ıdeıasynan týǵan jańa astananyń boı kóterýi týraly baıandap beredi. Qyryq bes mınýttyq «Megaǵımarattar: Astana – bolashaqtyń qalasy» fılminiń aldyn ala kórsetilimi elordadaǵy EKSPO-2017 kórmesi kesheninde ótti. Fılmniń álemdik tusaýkeseri 40-tan astam memlekette 22 tilde usynylmaq.
«Fılmniń negizgi tusaýkeseri «National Geographic channel» arnasynda ótedi jáne Ulybrıtanııa, Italııa, Ispanııa, Polsha, Sıngapýr, Úndistan sekildi barlyq Eýrazııa aýmaǵynda eki jyl boıy kórsetiledi. Ázirge kórsetilimniń naqty sany belgisiz», degen «National Geographic Partners» Eýropa-Afrıka bóliminiń atqarýshy vıse-prezıdenti Debora Armstrong Astana qurylystary qaıtalanbastyǵymen jáne ózgesheligimen tań qaldyratynyn, ǵajaıyp ári tartymdy qala ekenin aıtty.
«Eń aldymen, bul Qazaqstannyń Prezıdenti Nursultan Nazarbaevtyń armany edi. Az ýaqyttyń ishinde onyń barlyq oılaǵany iske asyryldy. Kórme aýmaǵyndaǵy qurylystar, sondaı-aq, «Nur álem» pavılony álemniń ár túkpirinen kóptegen adamdardy tartady. Biz «National Geographic: «Megaǵımarattar: Astana – bolashaqtyń qalasy» derekti fılminiń kórsetilimi aıasynda jas astananyń osyndaı tamasha nysandarymen tanystyratynymyzǵa óte qýanyshtymyz», dedi vıse-prezıdent.
Telearnanyń Eýropa-Afrıka bóliminiń atqarýshy prodıýseri Ivan Býso kartınada qalanyń qalyptasý tarıhyna ǵana emes, EKSPO-2017 halyqaralyq mamandandyrylǵan kórmesine de basa nazar aýdarylǵanyn jetkizdi. «Biz óz fılmderimizde adamdar tipti oılanbaıtyn nárselerdi kórsetemiz. Men osy jobada jumys isteı bastaǵan kezimde – 20 jyl buryn Astana mundaı tamasha ǵımarattarsyz shaǵyn ǵana qala bolǵanyn bildim. Qazir qazaq elordasy gúldene túsken. EKSPO-2017 obektileri, atap aıtqanda, «Nur álem» ulttyq pavılony 21 aıda salynyp shyqqan. Osy syndy tarıhtar adamdardy qyzyqtyryp, tań qaldyrady. Bul fılm álem jurtshylyǵyn Qazaqstanǵa kelýge shabyttandyratyny sózsiz», dedi ol.
Mamandar málimdegendeı, telearna ujymy bul fılmdi álemniń 170 elinde 37 tilde kórsetýdi josparlap otyr.
Ashat RAIQUL,
«Egemen Qazaqstan»
